Operacioni Forca e Ligjit i ka nisur kërkesën për deklarimin e pasurisë 3 të dënuarve për drogë e vjedhje.
Bëhet fjalë për shtetasit Artur Guri, Elton Andreica, të dy banues në Tiranë dhe Dylber Adema banues në Kukës.
Këta individë kanë 48 orë kohë për t’i kthyer përgjigje pyetjeve të OFL.
Njoftimi i OFL:
Vijon Operacioni Forca e Ligjit, në zbatim të detyrave të përcaktuara në Aktin Normativ të datës 31 janar 2020.
Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve:
Artur Guri, banues në Tiranë, i dënuar në Turqi për veprën penale “Eksportimi i drogave”, parashikuar nga legjislacioni penal i Turqisë;
Elton Andreica (Muça), banues në Tiranë, i dënuar për veprën penale “Vjedhja me armë”;
Dylber Adema banues në Kukës, i dënuar për veprën penale “Trafikimi i Narkotikëve”.
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.
OFL është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të gjithë personave që janë subjekt i Ligjit Special.
OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë.
