Një shqiptar 24-vjeçar rezident në Itali dhe një shtetas italian 63-vjeçar u arrestuan nga policia e shtetit fqinj pasi u kapën me një sasi rekord të lëndës narkotike mbi dy ton marijuanë, që sipas Policisë së Shtetit në vendin tonë, trafikimi nuk ka lidhje me Shqipërinë.
Guardia di Finanza arrestoi në zonën e San Benedetos në Itali, dy personat e përfshirë në këtë trafik që do të transportonin me makinë marijuanën, por nuk ka mundur të arrestojë trafikantët që transportuan me gomone drogën.
2322 kilogramë marijuanë e sekuestruar është bilanci i operacionit anti-drogë të nisur në orët e mbrëmjes të së premtes dhe i përfunduar të shtunën në mëngjes. Të dy të arrestuarit ishin në bordin e një furgoni dhe po shkonin drejt grykës së Trontos, gati për të transportuar lëndën narkotike që po vinte me gomone nga persona të tjerë.
Ndërkohë, në nje reagim të policisë së Shtetit shqiptar, thuhet se “gomonia oqeanike ka mundur të shkarkojë në breg të detit lëndën narkotike dhe është larguar në ujërat detare mes Kroacisë dhe Malit te Zi duke i shpëtuar ndjekjes së skuadrave të Guardia di Finanzës”.
Skuadrat e GdF në afërsi të bregut në zonën e San Benedetos kanë sekuestruar lëndën narkotike të hedhur nga gomonia në një sasi prej 2322 kg e dyshuar marjuanë dhe 625 litra benzinë, si dhe kanë arrestuar dy persona të cilët ishin me një furgon gati për të transportuar lëndën narkotike, konkretisht: shtetasi shqiptar rezident në Itali K.D, 24 vjeç dhe shtetasi italian R. A. 63 vjeç.
“Vijojnë hetimet e përbashkëta Itali -Kroaci-Mal i Zi dhe Shqipëri, ku ka një shkëmbim intensiv të informacioneve me policinë italiane dhe Guardia di Finanza për hetimin e rastit, por nuk ka elemente që lidhin këtë rast trafikimi me Shqipërinë. Gomonia ka mundur t’i shpëtojë ndjekjes që ka zgjatur disa orë derisa ka humbur gjurmët në ujërat mes Kroacisë dhe Malit të Zi. Vijon kontrolli në det për gjetjen e gomones dhe arrestimin e trafikantëve”, thuhet në njoftimin zyrtar të Policisë së Shtetit, i cili duhet theksuar, se u bë publik, pasi lajmi u përhap së pari në mediat italiane. /b.d
Kapen në San Benedeto mbi 2 tonë drogë, arrestohen italian dhe shqiptari
