Gjykata e Krimeve të Rënda ka vendosur arrest me burg për Armand Koçerrin , ndërsa 20 ditë burgim për Nezar Seitin, të cilësuar si anëtarë të bandës së Habilajve që vepronte në Babicë të Vlorës.
Me kërkesë të Prokurorisë, Koçerri u la në burg në kuadër të hetimeve që po zhvillohen për trafikun e drogës nga Shqipëria në Itali. Në banesën e Armand Koçerrit në Babicë tre ditë më parë u gjet pothuajse 4 ton marijuanë, e cila ishte bërë gati për t’u trafikuar. Hetuesit thonë se droga i përket bandës së Habilajve.
Ndërkohë, ndaj Nezar Seitit u dha masa e sigurisë 20 ditë burg. Ai ishte në shpallur në kërkim si pjesë e dosjes hetimore të Habiljave duke u konsideruar bashkëpunëtor i tyre dhe u kap dy ditë më parë. Nezar Seiti ishte shpallur në kërkim ndërkombëtar nga Italia, e cila kërkon ekstradimin e tij. Ndërsa në kërkim vijon të mbetet Florian Habilaj i njohur me pseudonimin “Lolo”, i cili është vëllai i Moisi Habilajt i arrestuar në Itali.
Në dosjen hetimore të prokurorisë italiane, në përgjime del edhe emri i ish-ministrit të Brendshëm Saimir Tahiri. Ndaj Tahirit, Prokuroria shqiptare e Krimeve të Rënda ka ngritur akuzë për trafik droge, grup i strukturuar kriminal në formë të posaçme dhe korrupsion pasiv i funksionarëve vendorë.
a.ç
