Ditët e fundit ngjarja që ka marrë vëmendjen e opinionit është përplasja e rusëve me ushtarët shqiptarë në uzinën e Gramshit. Në Dritare TV në rubrikën Komenti i Ditës gazetari Dritan Hila foli për këtë çështje, duke e vënë theksin tek interesi i rusëve në këtë kohë, si agjentë të shërbimit sekret.
“Gramshi ka qenë një pikë e rëndësishme për prodhimin e armatimin shqiptar. Uzina e Gramshit dikur ka qenë një uzinë për prodhim armësh. Ministri i Mbrojtjes, Niko Peleshi pretendon se tani nuk ka aktivitet në Uzinë, por gazetarët, referuar burimeve zyrtare thonë të kundërtën.
Që Uzina e Gramshit, nuk është më ajo që ka qenë dikur, kjo është e dukshme. Por përse duheshin tre operativë të shërbimit sekretë rusë për t’u futur në Uzinën e Gramshit?
Le ta marrim të mirëqenë që ata nuk janë blogerë, por operativ të shërbimit sekret. Rusia është në luftë jo vetëm në atë që e shohin të gjithë me Ukrainën, por edhe në një luftë psikologjike, që ka lidhje me perceptimin e Rusisë dhe fuqisë së saj në botë.
Rusia ka nevojë të tregojë që është ende një fuqi e madhe ushtarake, që mund të godasë pranë kufijve por edhe më larg tyre.
Në këtë aspekt doja të përmendja rastet kur kemi pasur shpërthime të depove me municione në vendet e NATO-s. I tillë ka qenë shpërthimi i një baze ushtarake në Çeki. Që tregon se shërbimi operativ sekret rus vepron edhe jashtë kufijve.
Gjithashtu kemi goditje të bazave ku NATO-ja çon furnizime për Ukrainën”, u shpreh Hila.
Duke folur për sulmin e rusëve në Uzinën e Gramshit, Hila tha se nëse ky skenar do të ndodhte, kjo do të ishte një sukses për Rusinë dhe nga ana tjetër, një goditje për NATO-n.
“Nëse në Gramsh do të kishim një shpërthim do të quhej një sukses i shërbimit sekret rus. Media nuk do të merrej më me çështjen se sa fishekë prodhonte Gramshi, sa armë demontonte, por që një bazë ushtarake e NATO-s është goditur.
Kjo do të shkaktonte një valë entuziazmi në Rusi dhe do të tregonte se Rusia është në gjendje të godasë edhe në prapavijat e thella të NATO-s. Kjo do të tregonte se NATO nuk është në gjendje të ruajë as bazat e saj, e jo më të ndihmojë Ukrainën të fitojë luftën me Rusinë”, u shpreh ai.
g.kosovari
