Kryetari i komisionit të posaçëm për reformën në drejtësi, Fatmir Xhafaj, deklaroi të premten se nuk është njohur me formulën e kompromisit të propozuar nga Partia Demokratike, që zgjidh ngërçin e emërimeve në disa institucione të drejtësisë. Përkundër kësaj, ai tha se maxhoranca i ka bërë opozitës dy propozime për formulën e përzgjedhjes së anëtarëve në Këshillin e Lartë të Gjyqësorit dhe në Këshillin e Lartë të Prokurorisë.
“Ne nuk e kemi këtë propozim te PD-se”, u shpreh Xhafaj, pas mbledhjes së sotme të komisionit, ku opozita mungoi serish. Ai u shpreh kritik ndaj sjelljes së PD-se për ta bërë publike në media formulën e kompromisit, para se kjo tí bëhej e njohur komisionit të posaçëm.
“Ka një diferencë mes nesh(maxhorancës dhe opozitës). Për gjëra që janë në proces negocimi ne nuk i bëjmë publike, kurse PD bën publike një gjë që nuk e ka çuar në tryezë negocimi. Ne i kemi dhënë PD-së para disa ditësh formulën e përzgjedhjes së anëtarëve në Këshillin e Lartë të Gjyqësorit dhe në Këshillin e Lartë të Prokurorisë, por këtë nuk e kemi bërë publike për të ruajtur konfindencialitetin e negociatave. Ne nuk e kemi propozimin e tyre”, saktësoi kryetari Xhafaj.
Dy ditë më parë Partia Demokratike tha se i ka propozuar maxhorancës një formulë të re kompromisi për procesin e emërimeve nga parlamenti të anëtarëve të katër institucioneve të drejtësisë, një çështje që vazhdon ta mbajë në ngërç reformën në drejtësi. Kjo formulë, sipas opozitës, është në respekt të rekomandimit 88 të Komisionit të Venecias, zbatimi i i të cilit ishte dhe kushti i vendosur nga PD për miratimin e draftit të ndryshimeve kushtetuese. (java / r.a)
