Është mbledhur sërish sot Komisioni i Posaçëm për Reformën në Drejtësi ku kanë vijuar diskutimet nen për nen mbi Draftin. Në fund të mbledhjes përfaqësuesit e mazhorancës dhe opozitës kanë vijuar me qëndrimet e largëta midis tyre. Opozita e ka cilësuar Draftin aktual si një projekt kapjeje të sistemit. Këto pretendime u hodhën poshtë nga kryetari i komisonit Fatmir Xhafaj. Ai thotë se gjithçka është realizuar me ekspertizën e BE dhe SHBA. Po ashtu sipas tij çështje politike është vetëm ajo e shumicave të cilësuara, referuar edhe mendimit të Komisionit të Venecias.
“Ajo tavolinë atje është tavolinë politikanësh dhe aty negociohet edhe politikisht. Ka një çështje që është mirëfilli politike siç është formula e zgjedhjes së titullarëve. Në vlerësimin tim Venecia ka lënë vetëm një çështje që duhet të zgjidhet politikisht, që janë zgjidhja e shumicave të cilësuara. Për çështjet e tjera duhen zgjidhur teknikisht. Komisioni i Venecias e ka bërë të qartë. Ne thirrëm mendim OPDAT dhe EURALIUS, ata na sollën pikërisht këtë projekt mbi të cilin po diskutojmë teknikisht. Angazhimi i BE dhe SHBA do të thotë paanshmëri dhe objektivitet. PD ka lexuar sot një promemorie politike të hartuar në zyrat e tyre politike, por aty mendoj se duhet të sillemi si ligjvënës.
Kam për ta një pyetje shumë publike: Një projekt të cilin e kanë punuar ekspertë ndërkombëtarë, ka punuar Brukseli, Uashingtoni, gjithë këta kanë gabuar dhe ka të drejtë PD?”, tha Xhafa.
Ndërkohë përfaqësuesi i PD në komision Oerd Bylykbashi tha se palët janë ende larg një zgjidhjeje, pasi sipas opozitës Drafti aktual kap sistemin. Gjithsesi ai tha se opozita mbetet e hapur për të gjetur konsensusin.
“Mazhoranca qëndorn në atë që është një sistem kapjeje, ndërkohë ne me punën tonë kërkojmë që ky sistem të çmontohet. Ne bëmë propozimet tona të arsyeshme. Diskutimet nen për nen u mbyllën. Mbetet të arrijmë një zgjidhje të përbashkët në aspektin teknik dhe politik. Në qoftë se mazhoranca ngul këmbë në miratimin e një sistemi kapjeje siç është sot nuk mund të ecet.”, tha Bylykbashi./a.m.
