Javën e ardhshme projekti kushtetues për reformën në drejtësi pritet të jetë gati për votim nga Kuvendi. Sipas kryetarit të Komisionit të Posaçëm për Reformën në Drejtësi Fatmir Xhafaj, brenda kësaj jave ekspertët ndërkombëtarë pritet të sjellin draftin final me vulën e Komisionit të Venecias. Këtë deklaratë ai e dha pas mbledhjes së komisionit që u mbajt pa praninë e opozitës.
“Ne u kemi lënë detyrë ekspertëve ndërkombëtarë që brenda kësaj jave të na paraqesin projektin që ka vulën e Venecias. Duke filluar nga java e ardhshme është gati projekti kushtetues për tu votuar në Parlament nëse ka vullnet të opozitës, mazhoranca ka vullnet absolut. Duke qenë se mazhoranca beson fort te ekspertiza ndërkombëtare. Mbetet të shohim vullnetin e opozitës. Meqenëse të gjithë bërtasin rroftë reforma në drejtësi, ta votojmë”, tha Xhafa.
Më tej Xhafa sqaroi për mediat pikat e diskutuara gjatë mbledhjes së sotme ku mediat nuk ishin të pranishme.
“Kemi një opinion të komisionit të Venecias për të cilin jemi dakordësuar për ta pasur si kornizën ku do përqendrohet ky projekt. Kemi edhe ekspertizën e ekspertëve ndërkombëtarë të atashuar. Sot kemi bërë një hap të madh përpara, një hap të rëndësishëm. Kemi dëgjuar dy përfaqësuesit ndërkombëtarë. Përfaqësuesin e EURALIUS, kemi dëgjuar gjithashtu përfaqësuesin e OPDAT. Të dy zotërinjtë kanë dhënë qëndrimin e tyre lidhur me pyetjet e bëra nga anëtarët rreth projektit kushtetues për çështje të caktuar. Dhe kanë dhënë mendimin e tyre për çështjet e debatueshme të natyrës teknike dhe është kërkuar opinion kryesisht nga përfaqësuesit e opozitës”, tha Xhafa.
