Drafti për Reformën në Drejtësi e nxjerr “politikën nga dera”, ndërsa “vendet e rezervuara” e fusin “politikën nga dritarja”.
Ky ka qenë komenti i bërë nga kryetari i Komisionit të Posaçëm për Reformën në Drejtësi, Fatmir Xhafaj, lidhur me kushtin e opozitës që kërkon që 5 emërimet në KLGJ dhe KLP, të bëhen mbi bazën e “vendeve të rezervuara” në bazë të raporteve politike në Kuvend. Me këtë vlerësim Xhafaj ka bërë të qartë se PS nuk e pranon formulën e “vendeve të rezervuara”, por gjithsesi ai ka bërë të ditur se janë dhe plot zgjidhje të tjera, të cilat mundësojnë arritjen e një marrëveshje konsensuale, e cila do t’i jepte një rol shumë të rëndësishëm, si pozitës, ashtu edhe opozitës në proces.
“Mjafton të shikojmë sesi qëndron çështja e funksionimit të KQZ-së, ku anëtarët votojnë në bazë të partive që i kanë dërguar në atë komision. Gjithësesi, KQZ është një instrument politik i partive. Por emërimet në KLGJ dhe KLP nuk mund të jenë të tilla, sepse bëhet fjalë për pushtet të pavarur. Vendet e rezervuara cënojnë pavarësinë e pushtetit gjyqësorë. Ka shumë mundësi për të gjetur zgjidhje. Ka zgjidhje që e bëjnë aktiv rolin e partive në proces. Por kurrësesi përfaqësuesit e drejtësis nuk mund të jenë të X apo Y partie. Ndarja në parcela politike, sipas kostumit të partive, gjykojmë se do të ishte e dëmshme”, ka theksuar Xhafa.
Sipas tij, është pozitive që ka dakordësi nga të gjitha palët për draftin dhe se do të gjendet një zgjidhje, pasi ka një projekt kushtetues të gjithëpranuar. Xhafa informoi se nesër pritet të mblidhet komisioni për Reformën në Drejtësi, dhe palëve u është shpërndarë edhe drafti. Sipas tij, palët duhet të reflektojnë vetëm mbi draftin e paraqitur të datës 4 maj, draft i cili gëzon edhe mbështetjen e ndërkombëtarëve.
Me. Ar
