Nga Skënder Minxhozi/
Merkel u pasua në Tiranë, pak ditë më pas, nga ai që ka qenë një ndër kundërshtarët më të fortë të saj politikë në Gjermani: Martin Shulz, një ndër figurat qëndrore të socialdemokratëve gjermanë. Shulz është një njohje e vjetër e politikës shqiptare. Mik personal i liderëve të majtë shqiptarë Rama e Meta, ai ka qenë veçanërisht aktiv në vitet kur përplasjet politike në Shqipëri prodhuan trauma të rënda kombëtare.
Sot Shulz kishte zbritur në Tiranë me kostumin e kryetarit të Parlamentit Europian. Dhe kishte ardhur për të kërkuar nga politika shqiptare, pikërisht atë që kërkoi pesë ditë më parë “armikja” e tij kristian demokrate Angela Merkel. Pra, një reformë të thellë në drejtësinë shqiptare. Martin Shulz ka kërkuar që Shqipëria “të shënojë progres në vendosjen e shtetit ligjor në të gjithë drejtimet e tij, përfshirë një reformë të thellë të sistemit të drejtësisë”. Mesazh më të qartë se kaq është e pamundur të gjesh.
Perëndimorët kanë kohë që e kanë zhveshur gjuhën dhe i kanë lënë mënjanë kortezitë, kur vjen fjala për drejtësinë në vendin tonë. Ish-ambasadori amerikan në Tiranë Arvizu shprehej se disa nga gjyqtarët e sotëm do të donte t’i shihte në burg, pasardhësi i tij përdor një gjuhë identike me Arvizun, kurse Angela Merkel e nënvizon reformën në drejtësi, si njërën ndër dy prioritetet e vizitës së saj. I pari, ai i azilkërkuesve dhe e dyta, reforma në drejtësi.
Ka qenë ky presion i skajshëm i ndërkombëtarëve që ka ulur më në fund të tryezën e reformës parlamentare, pozitën dhe opozitën. Ndryshe nga reforma tjetër e madhe, ajo territoriale, kjo e drejtësisë duket se do të ketë më në fund praninë e pakicës në tryezën e bisedimeve. Një shans i shtuar që produkti final të mos jetë një imponim shifrash, por një kompromis nga ata që ndryshojnë rrjedhën e historisë së një vendi. Ndërkohë duhet të mjaftohemi me mesazhet e të huajve. Është pak, por e sigurt…
