Javanews/ Ditën e djeshme u zbardh drafti me amendamentet kushtetuese, i përpunuar dhe nga eskpertët e EURALIUS dhe OPDAT. Një nga propozimet e reja kyçe, është dhe se kush do të jenë ata zyrtarë të lartë të cilët do të mund të hetohen nga ana e Prokurorisë dhe Gjykatës së Posaçme, institucione këto që do të krijohen pas miratimit të reformës në drejtësi.
Në propozim thuhet se funksionarët e lartë që do të hetohen për korrupsion apo krim të organizuar përfshijnë:
Funksionarë të lartë përfshijnë Presidentin në detyrë dhe ish – Presidentët e Republikës, Kryetarin në detyrë dhe ish – Kryetarët e Kuvendit, Kryeministrin në detyrë dhe ish – Kryeministrat, anëtarët e Këshillit të Ministrave në detyrë, anëtarët e Këshillit të Ministrave gjatë tre viteve të fundit, Prokurorin e Përgjithshëm, Inspektorin e Lartë të Drejtësisë, Kryetarët e Bashkive dhe deputetët e Kuvendit, Zëvendësministrat, anëtarët e Këshillit të Lartë Gjyqësor dhe të Këshillit të Lartë të Prokurorisë, anëtarët e Gjykatës Kushtetuese, Gjykatës së Lartë dhe Gjykatës së Lartë Administrative dhe drejtuesit e institucioneve shtetërore qëndrore ose të pavarura të përcaktuara në Kushtetutë. (neni 135)
Ajo që bie në sy është fakti se në këtë propozim nuk janë të përfshirë në mënyrë direkte Ministrat e qeverive të shkuara, por vetëm “anëtarët e Këshillit të Ministrave përgjatë 3 viteve të fundit”… pra jashtë rrjetës së Prokurorisë dhe Gjykatës speciale, të paktën sipas këtij propozimi, do të qëndrojnë ish ministrat e qeverisë Berisha.
Përsa i përket mënyrës së zgjedhjes së gjyqtarëve të Gjykatave të Posaçme, mekanizimi për verifikimin e tyre do të jetë i hollësishëm, ndërsa emërimi i takon institucionit që do të zëvendësojë KLD-në, Këshilli i Lartë Gjyqësor.
Gjyqtarët e gjykatave të posaçme për gjykimin e veprave penale të korrupsionit dhe krimit të organizuar, emërohen nga Këshilli i Lartë Gjyqësor në përputhje me këtë dispozitë dhe ligjin. Kryetari i gjykatës dhe gjyqtarët e këtyre gjykatave shkarkohen përpara përfundimit të mandatit në rastet e shkeljeve të rënda disiplinore me dy të tretat e votave të Këshillit të Lartë Gjyqësor . Gjyqtarët dhe administrata gjyqësore u nënshtrohen me sukses verifikimit të pasurisë dhe të figurës. Këshilli i Lartë Gjyqësor nuk mund të emërojë asnjë gjyqtar pa marrë pëlqimin e tij dhe familjarëve të afërt për kontrollet periodike të llogarive bankare dhe telekomunikimeve personale, sipas ligjit. Telekomunikimet personale të familjarëve të afërt të cilët nuk kanë dhënë pëlqimin, do monitorohen vetëm me vendim gjykate.
Javanews/a.k
