Kreu i Gjykatës së Apelit në Tiranë Alaudin Malaj në një intervistë për Tonight te Ilva Tare deklaron se nuk është vetëm sistemi i drejtësisë që vuan nga korrupsioni, por ai e sheh problemin tek shoqëria shqiptare në përgjithësi.
“Sistemi i drejtësisë në Shqipëri nuk ka qenë i qetë asnjëherë për të ushtruar detyrën e tij. Nuk kam ardhur të mbroj gjyqtarët e korruptuar, por duhet ti etiketojmë cilët janë.
Të bëhen publikë. Gjyqtarët duhet të kenë një marrëveshje me shkrim me shtetin, këtu duhet ta fillojmë reformën në drejtësi, ku të lejojnë shtetin ti kontrollojë për çdo gjë dhe në çdo gjë.
Kur u hodh ideja e heqjes së imunitetit të gjyqtarëve që asnjëherë nuk i ka mbrojtur, pasi janë sulmuar. Të ketë dhe një mbrojtje të tillë politike.
Mbështetje nga e gjithë shteti në momente të vështira, që i riskohet jeta, familja, puna. Nga ’93 e deri sot sistemi gjyqësor ka përparuar. Sistemi i drejtësisë është shërbim ndaj publikut për atë që i takon.
Atmosfera është për të ardhur keq. Gjyqtarët janë totalisht të frikësuar, të gjithë po presin të largohen në dhjetor nga puna. Gjyqet po bëhen jo në mënyrën e duhur.
Ka filluar një “shthurje” e madhe. Ne gjyqësorin në Shqipëri na e prish kategoria e gjyqtarëve që ka markim politikën, ajo që mbrohet nga politika.
Ka gjyqtarë që marrin leje te deputeti për të zgjidhur një çështje.Që nuk ka ndodhur më parë ndonjëherë.Është e papranueshme.
Sot niveli i zbatimit të ligjit në Shqipëri ka arritur nivelin më minimal për shkak të këtij presioni nga të gjitha krahët, politika është një pjesë e këtij presioni. Problemi kyç është gjithë shoqëria shqiptare”.
