Enkelejd Alibeaj thotë se drejtësia e re nuk është më lojë, ashtu sic nisi në 2016. Sipas tij, të gjithë ata që e votuan drejtësinë me 140 vota menduan se do ketë drejtësi, por jo për pjesën elitare të politikës.
Teksa i referohet fakteve, Alibeaj thotë se SPAK po vepron, duke goditur sistemin politik të korruptuar dhe jo individët.
“Çështja e drejtësisë së re nuk është më lojë. Nisi si lojë në 2016, të gjithë mendonin në ato kohë që do ketë drejtësi, por jo për pjesën elitare politike. Faktet tregojnë që veprimtaria e SPAK po tregon se nuk është se po godet individë të veçantë, por po godet sistemin politik të korruptuar”, tha Alibeaj në emisionin Log në News24.
