Në 5 vjetorin e vrasjes së katër protestuesve të pafajshëm në protestën e 21 janarit 2011 nga Garda , nesër në orën 12.00, në Bulevardin “Dëshmorët e Kombit” do të zhvillohen homazhe në nderim të kujtimit të tyre. Javanews kontaktoi me familjarë të njërit prej të vrarëve, Hekuran Dedës, të cilët bën të ditur se do të jenë të pranishëm në këtë ceremoni përkujtimore. Familjarët e Dedës nuk bënë komente lidhur me faktin se si ndihen ata kur edhe pas 5 vitesh drejtësia ende nuk e ka thënë fjalën e saj për vrasjen e protestuesve të pafajshëm, të cilët u vranë publikisht në qendër të Kryeqytetit nga Garda e qeverisë, duke u shprehur se kanë të njëjtat qëndrime për këtë çështje të shprehura ndër vite se “drejtësia nuk është vënë në vend”.
Të pranishëm në homazhet në nderim të 4 të vrarëve në protestën e 21 janarit priten të jenë jo vetëm familjarë të viktimave, por edhe drejtues të lartë të qeverisë, duke filluar që nga kryeministri Edi Rama, ministra dhe deputetë të mazhorancës. Ende pas 5 vitesh 21 janari vijon të jetë një çështje mjaft sensitive për opinionin publik dhe politik.
Nga ana tjetër 21 janari është edhe prova e një drejtësie të kapur nga politika, pasi deri më tani nuk ka mundur të verë përpara drejtësise ata që urdhëruan vrasjet dhe ekzekutorët e 4 protestuesve të pafajshëm. (javanews.al) Me. Ar