Kryetari i Partisë demokratike Lulzim Basha shprehu edhe njëherë vendosmërinë e forcës që drejton për të kundërshtuar miratimin e reformës në drejtësi pa implementimin sipas tij të plotë të rekomandimit 88 të venecias, apo “vendeve të rezervuara”. Sipas Bashës, opozita nuk mund të pranojë asgjë më pak se sa kaq.
“Plotësimi i kushtit të vetëm rekomandimi 88, për një drejtësi të pavarur nga mazhoranca aktuale. Ne nuk kërkojmë asgjë më shumë se zbatimi i plotë i rekomandimit të arbitrit, që është Komisioni i Venecias. Zgjidhja është aty, e kemi formuluar, mënyrat format evropiane të implementimit 88. Asnjë argument nuk është paraqitur nga ana tjetër. Nëse kjo oligarki është e vendosur të sabotojë reformën në drejtësi apo ta shtyjë vendin drejt destabilizimit politik përmes delegjetimimit të parlamentit, opozita në zgjedhjet e ardhshme do kërkojë votën për një reformë në drejtësi sipas standardeve të Venecias”, tha Basha.
Kryetari i opozitës i’u rikthye akuzave ndaj kryeministrit Rama për lidhje me botën e krimit. Ai tha se aleanca më e fortë është ajo e Ramës me krimin, që siaps tij merr vendimet për gjithçka.
“Përtej premtimeve të bukura, Edi Rama u shfaq para shqiptarëve si një politikan revanshist, i lidhur me botën e krimit qysh kur ishte në krye të bashkisë Tiranë. Ne e pamë dhe e prekëm që në fillim këtë vullnet të mbrapshtë, sepse ai kishte bashkuar nëpërmjet paktit të qelbësirave, njerëz të inkriminuar. Pakti me krimin para vitit 2013 filloi të japë rezultate menjëherë, promovimi i të inkriminuarve në parlament, tatime, dogana, polici dhe çdo zyrë shteti. 2.2 miliard euro para të shpërdoruara, zhvatura në 2 vite qeverisje.
Në një vend ku krimi merr vendimet për gjithçka. Doganat dhe tatimet janë kthyer në mburojë të evazionistëve. Në një vend ku krimi bashkëqeveris dhe është aleati më i besuar i kryeminsitrit Rama, nuk kemi çfarë të presim më shumë se papunësi, dëshpërim, depresion, si asnjëherë më parë. Denoncimet tona dolën në dritën e diellit dhe para opinionit ndërkombëtar”, tha Basha.
