Gjykata e Shkallës së Parë në Dubrovnik ka vendosur ekstradimin e Ballist Morinës drejt Serbisë, ndonëse çështja është çuar për apelim. Sipas ministrisë së Brendshme, ministri Demiraj po vijon me intensitet përpjekjet për zgjidhjen në rrugë ligjore të kësaj çështje, ndërsa është takuar edhe me ambasadoren kroate në Tiranë.
“Lidhur me çështjen e arrestimit për efekte ekstradimi të shtetasit shqiptar Ismail Morina, Ministri i Punëve të Brendshme, Dritan Demiraj, që një muaj më parë sapo është njohur me ndalimin e tij, ka marrë menjëherë kontakt me ambasadoren kroate në Tiranë Sanja Bujas-Juraga, të cilën e ka informuar në detaje për çështjen në fjalë. Vetë ministri Demiraj dhe familjarët e zotit Morina, ka vënë në dispozicion të autoriteteve kroate dokumentacionin që dëshmon përdorimin politik të kësaj çështje. Ministri i Punëve të Brendshme, Dritan Demiraj po vijon me intensitet përpjekjet për zgjidhjen në rrugë ligjore të kësaj çështje, duke kërkuar nga autoritetet kroate që çështja të gjykohet drejt”, thuhet në një reagim të zyrës së shtypit të Ministrisë së Punëve të Brendshme për ‘BalkanWeb’.
Ismail “Ballist” Morina, i njohur për autorësinë e ngritjes së dronit në Beograd më nëntor të vitit 2015 gjatë ndeshjes Serbi-Shqipëri vazhdon të jetë pas hekurave në Kroaci, aty ku qëndron i ndaluar prej afro një muaji, pasi ndaj është lëshuar një urdhër ekstradimi nga Serbia.
