Ndoshta mund të duket si paradoks, por është fakt që fermerët e Leshnicës, që kultivojnë vreshtat e rrushit, në Bashkinë e Pogradecit nuk arrijnë ta shesin dot prodhimin e tyre për disa arsye.
Duke nisur nga mungesa e tregut, pesticidet e shtrenjta, mungesa e subvencionimit dhe ajo që është kryesorja, i konkurron në çmim rrushi që vjen nga Maqedonia e Veriut.
Hekuran Hamzai ka mbi 40 vjet që kultivon rrushin, por vështirësitë që po ndjen tani nuk i ka hasur ndonjëherë në jetën e tij.
Pas kaq shumë vitesh, ai po mendon seriozisht të heqë dorë nga vreshtaria, pasi nuk arrin të mbulojë as kostot.
Në vreshtat e fshatrave të Pogradecit mund të gjesh ende tonelata rrush pa u vjelë, e gjitha kjo si pasojë e mungesës së tregut për shitje dhe natyrisht vëmendjes së institucioneve shtetërore.
