Lufta tregtare mes Shteteve të Bashkuara dhe Kinës ka nisur zyrtarisht. Pekini njoftoi vendosjen e kundërmasave ndaj mallrave amerikane, pasi presidenti Donald Trump vendosi tarifën 10 për qind.
Kina vendosi një tarifë 15% për qymyrin dhe gazin natyror të lëngshëm, një taksë 10% për naftën bruto, makineritë bujqësore, kamionçinët dhe makinat me motor të madh, njoftoi një hetim kundër monopolit ndaj Google dhe vendosi kontrolle eksporti në 25 lloje të produkteve të rralla metalike. Gjithashtu ka përcaktuar disa kompani amerikane si biznese jo të besueshme..
Pekini thekson se ka dërguar një ankesë në Organizatën Botërore të Tregtisë në kundërpërgjigje të tarifave që hyjnë sot në fuqi nga Administrata Trump. Presidenti amerikan njoftoi se masat kundër Meksikës dhe Kanadasë janë shtyrë me një muaj, pas disa negociatave intensive me liderët e dy vendeve fqinje. Donald Trump konfirmoi në Truth pezullimin e tarifave “për të parë nëse mund të strukturohet apo jo një marrëveshje përfundimtare ekonomike”.
Otava ka rënë dakord të “sigurojë një kufi të sigurt verior dhe më në fund t’i japë fund fatkeqësisë vdekjeprurëse të drogës si fentanili që kanë vërshuar në vendin tonë, duke vrarë qindra mijëra amerikanë. Si president, është përgjegjësia ime të siguroj sigurinë e të gjithë amerikanëve. Jam shumë i kënaqur me këtë rezultat fillestar”, shtoi Trump.
Në njoftimin e pezullimit të tarifave amerikane ndaj Kanadasë për 30 ditë pas një “telefonate të mire” me Trump, Justin Trudeau përshkroi planin e tij kufitar prej 1.3 miliardë dollarësh duke premtuar “forcimin e kufirit me helikopterë, teknologji dhe personel të ri, koordinim më të mirë me partnerët amerikanë dhe rritje të burimeve për të frenuar rrjedhën e fentanilit”. “Rreth 10,000 burra në vijën e pare”, u shpreh kryeministri kanadez.
Gjithashtu premtoi emërimin e një “cari” për të luftuar trafikun e drogës dhe përcaktimin e karteleve si grupe terroriste. Edhe Meksika pranoi dërgimin e 10 mijë ushtarëve në kufirin me Shtetet e Bashkuara për të luftuar emigracionin e paligjshëm dhe trafikun e drogës
