Fjala tashmë është e parlamentit për qeverinë e re të Italisë. Mario Draghi e nisi me Senatin, ku prezantoi këtë të Mërkurë programin e qeverisë që do të drejtojë duke shpresuar të jetë në krye deri në fund të mandatit aktual në vitin 2023.
Përpara senatorëve, Draghi tha se prioriteti kryesor i qeverisë së tij është lufta kundër pandemisë së koronavirusit dhe në veçanti përshpejtimi i ritmeve të imunizimit të popullatës. Ish-drejtuesi i Bankës Qendrore Europiane nuk la pa përmendur edhe monedhën e përbashkët europiane Euro.
Ai e bëri të qartë se kishte si qëllim të lëshonte nga sovraniteti kombëtar për të qenë pjesë e buxhetit të përbashkët europian, pasi sipas tij, “Jashtë Euros ka më pak Itali”.
Pavarësisht se është shquar për euroskeptik, kreu i Lega Nord, Mateo Salvini tha se partia e tij i jepte mbështetje të plotë qeverisë së re, duke shprehur mbështetje në planet për më pak taksa e për fuqizimin e sistemit shëndetësor.
Votimi në Senat pritet gjatë kësaj të Mërkure, ndërsa të Enjten, Draghi do të zbresë në Dhomën e Ulët. Ai ka mbështetjen e shumicës dërrmuese në të dy dhomat e parlamentit italian./a.p
