Komisioni i posaçëm për reformën në drejtësi, do të mblidhet ditën e nesërme për të disktuar dhe për tu njohur me draftin, tashmë të përfunduar nga ana e ekspertëve. Mbledhja do të fillojë në orën 11:00 teksa pritet edhe prezenca e deputetëve të opozitës.
Pas diskutimeve dhe shqyrtimit në Komision drafti do t;i kalojë menjëherë Komisionit të Venecias për opinion.
Kështu procesi i reformës në drejtësi ka marrë një tjetër rrugë, edhe pse ngërçi mes maxhorancës dhe opozitës mbetet ende aktual, në lidhje me formulën e votimit të zyrtarëve dhe instancave më të larta të gjyqësorit.
Drafti që do të shqyrtojë nesër Komisioni Posaçëm është ai i përpiluar nga ekspertët e maxhorancës, kjo pasi opozita braktisi tryezën e reformës, e organizuar nga teknicienët dhe konstitucionalistët.
Ndërkohë, këtë të enjtë ka patur zhvillime në aspektin politik. Kreu i Parlamentit Ilir Meta ka takuar në mëngjes Kryeministrin Edi Rama në kryesinë e Kuvendit. Të dy drejtuesit e maxhorancës kanë patur një diskutim të gjatë në lidhje me procesin e deritanishëm dhe reformën në drejtësi.
Më pas në kryesinë e Kuvendit ka ardhur për një takim kokë më kokë me Metën edhe ambsadorja e BE-së Romana Vlahutin. Takimi mes Metës dhe Vlahutin ka zgjatur disa minuta dhe më pas ambsadorja e BE-së është larguar pa dhënë asnjë prononcim për median.
