Kryeministri Edi Rama ka përgënjeshtruar edhe njëherë deklaratën e kryeparlamentarit të Kosovës, Glauk Konjufca, i cili tha dje se draft asociacioni i hartuar nga qeveria e Shqipërisë kishte elementë të autonomisë serbe. Rama tha se gjatë takimit ata nuk kanë folur fare për draft asociacionin dhe se sipas tij, Konjufca e tha atë deklaratë pasi ashtu e ka mësuar Kurti.
“Unë me Glukun kemi pas një bisedë fantastike, unë flisja Glauku qeshte. S’kam folur asnjë fjalë për draftin. Asnjë fjalë. Por, pse i tha Glauku ato jashtë, pyesin albinin që nuk ishte në takim, jo Glaukun që ishte në takim. Glauku s’di ca është drafti, si ca duhet të thotë para kamerave pasi është konsultuar me Albinin. Kështu funksionin demokracia në Kosovë dhe unë e respektoj se kështu thotë albini, se është vendi me demokratik në Ballkan”, tha Rama.
Kryetari i Kuvendit të Kosovës, Glauk Konjufca, në një prononcim pas takimit me kryeministrin Rama, komentoi më herët përpjekjet e tij për zgjidhjen e krizës në veriun e Kosovës dhe draft-statutin e Asociacionit të Komunave me Shumicë Serbe, të cilin ua ka dorëzuar kancelarive evropiane.
Ai ka thënë se kryeministri Rama ka ndarë me autoritetet kosovare vetëm elementet e këtij mekanizmi madhor për serbët e Kosovës, porse sipas tij, propozimi i hartuar nga “ekspertë ndërkombëtarë” dhe i prezantuar nga kreu i qeverisë shqiptare është në kundërshtim me Kushtetutën e Kosovës.
“Ai pretendon se është në përputhje me Kushtetuten e Kosovës… mua m’u kanë dukur qe elemente të caktuara të propozimit të kryeministrit Rama përmbajnë autonomi territoriale për serbët e Kosovës dhe kjo është në kundërshtim me interesat e kombit shqiptar dhe popullit të Kosovës”, ka thënë kryetari Konjufca.
