Sot në Kuvend pritet të miratohet ligji i ri për energjinë. Është një strategji kryekëput e re e menaxhimit të burimeve energjetike në vendin tonë, një strategji e re e funksionimit të OSHEE-së apo KESH-it, por me anë të këtij ligji pretendohet të vendoset një marrëdhënie e re me konsumatorin.
Një pikë mjaft e debatuar ka qenë gjatë kësaj kohe neni 89 i këtij projekti, i cili parashikonte bllokimin e hipotekës për të gjithë ata konsumatorë që rezultonin debitorë ndaj OSHEE. “Kuvendi ka një propozim të grupit parlamentar për heqjen e barrës hipotekore për konsumatorët familjarë”, tha Eduard Shalsi, kryetar i Komisionit të Veprimtarive Prodhuese.
Ligji i ri për energjinë elektrike parashikonte vendosjen e barrës hipotekore për konsumatorët familjarë, kur kalojnë vlerën debitore prej 300 mijë lekësh, ndërsa për bizneset kur kalojnë vlerën e 2 milionë lekëve. Një tjetër pikë debati ishte ajo e çmimit të lartë, që qytetarët duhet të paguajnë për faturat aforfe, për të cilën kryetari i Komisionit të Veprimtarive Prodhuese tha se, synohet që fundi i këtij viti të jetë edhe fundi i kësaj mënyre faturimi, pas pajisjes së të gjithë konsumatorëve me matës.
“Ne i kërkojmë qeverisë dhe Entit Rregullator të mbikëqyrin procesin e pajisjes me matës për të gjithë konsumatorët shqiptarë, në mënyrë që në fillim të vitit 2016, asnjë konsumator shqiptar të mos ngarkohet aforfe”, deklaroi më tej Eduard Shalsi. Deputeti i Partisë Demokratike, Sherefedin Shehu, tha se, bllokimi i hipotekës mbi pasuritë e paluajtshme ndaj abonentëve familjarë është në kundërshtim me etikën e mbrojtjes së konsumatorit.
Edhe pse mbledhja e Komisionit Parlamentar të Veprimtarive Prodhuese u zhvillua me dyer të mbyllura, ndër vendimet e marra është pajisja e të gjithë abonentëve familjarë me matësa të energjisë.
