Publikimi i mijëra faqeve dokumente të lidhura me abuzimet e Jeffrey Epstein nga Departamenti i Drejtësisë në SHBA ka shkaktuar zhgënjim dhe dyshime tek të mbijetuarit dhe opinioni publik. Ligji kërkonte që materialet të bëheshin publike deri të premten, por vetëm një pjesë e tyre u publikua, me redaktime të shumta.
BBC shkruan se të mbijetuarit shprehen se janë të shqetësuar pas një “publikimi të ngadaltë dhe të paplotë pa kontekst”. Ndërsa ekspertë ligjorë thonë se redaktimet mund të ushqejnë teoritë konspirative.
Liz Stein, një prej viktimave, tha për BBC se Departamenti i Drejtësisë “po shkel hapur Aktin e Transparencës së Dosjeve Epstein”. “Ne thjesht duam që e gjithë prova e këtyre krimeve të dalë në dritë,” tha Stein.
Edhe Marina Lacerda, e cila thotë se u abuzua në moshën 14-vjeçare nga Epstein, theksoi se shumë viktima janë ende “nervoze dhe skeptike” për mënyrën se si do të publikohen dosjet e tjera.
Mes dokumenteve të publikuara gjenden foto të Ghislaine Maxwell jashtë Downing Street, pretendime se Epstein prezantoi një vajzë 14-vjeçare te presidenti Donald Trump në resortin e tij në Mar-a-Lago, si dhe imazhe të ish-presidentit Bill Clinton. Ka edhe foto të brendësive të shtëpive të Epstein, udhëtimeve të tij jashtë vendit dhe figurave të njohura si Mick Jagger, Michael Jackson, Diana Ross dhe të tjerë.
Departamenti i Drejtësisë ka sqaruar se redaktimet janë bërë për të mbrojtur privatësinë e viktimave dhe për të shmangur ekspozimin e materialeve të ndjeshme, duke theksuar se “nuk po fshihen emrat e politikanëve”. Megjithatë, shumë dokumente janë të redaktuara rëndë, gjë që ka ngritur dyshime mbi transparencën e procesit.
Avokatë dhe ligjvënës kanë paralajmëruar se redaktimet e shumta mund të ushqejnë teoritë konspirative. Kongresmenët demokratë dhe republikanë që kërkuan publikimin e dosjeve e kanë cilësuar procesin “të paplotë” dhe kanë paralajmëruar masa ligjore.
Departamenti ka identifikuar mbi 1 mijë e 200 viktima ose të afërm të tyre dhe ka mbajtur materiale që mund t’i ekspozonin. Por fakti që disa dosje u hoqën nga faqja zyrtare pa shpjegim ka shtuar skepticizmin.
Ekspertët paralajmërojnë se kjo çështje do të vazhdojë të tronditë opinionin publik dhe politikën amerikane, ndërsa të mbijetuarit kërkojnë transparencë të plotë dhe drejtësi.
