Një vit pas ekzekutimit të biznesmenit Memli Begalla në zonën e ish-bllokut, Prokuroria e Tiranës përfundoi hetimet dhe ngriti akuzë zyrtare për ish-policin Ardian Serezi dhe Denis Demirin. Ndaj dy të pandehurve rëndon akuza e vrasjes me paramendim në bashkëpunim, vepër penale për të cilën rrezikojnë dënim me burgim të përjetshëm.
Në kërkesën për gjykim që disponon Neës 24, hidhet dritë mbi të gjithë dinamikën e krimit dhe renditen provat e fajësisë kundër të pandehurve.
Ndonëse ish-polici Ardian Serezi pretendon se ka qenë duke u falur në xhaminë e Kombinatit në kohën kur në ish-bllok u qëllua për vdekje biznesmeni, Prokuroria pretendon se ka prova që e rrëzojnë alibinë e tij.
Referuar pamjeve filmike të fiksuara nga disa kamera sigurie në zonë, rezulton se Serezi dhe Demiri, ky i fundit dyshohet si ekzekutor, janë ndalur fillimisht në një lokal tek Sheshi Ëillson, ku kanë konsumuar një kafe. Më pas ata e kanë ndjekur viktimën, dhe sapo Begalla ka mbërritur në vendparkimin e pallatit, është qëlluar për vdekje. Sipas prokurorisë, dy të pandehurit, janë larguar nga vendngjarja me një makine tip BMV, e cila u gjet e braktisur në fshatin Picallë katër ditë pas ngjarjes dhe rezultoi se ishte e vjedhur. Në momentin kur po i afroheshin makinës, ata janë fiksuar nga kamerat e sigurisë, sikurse shihet në këto foto.
Ndërkohë, në dosje thuhet se në automjetin e braktisur, u gjetën maskat që përdorën autorët e dyshuar. Në njërën prej tyre janë gjetur gjurmë të pështymës, të cilat janë krahasuar me kampionin, që i është marrë të pandehurit Demiri. Përputhshmëria ka rezultuar shumë e lartë. Kjo provë, sipas institucionit të akuzës është shkencore dhe provon përfshirjen direkte të Demirit në ngjarje.
Lidhur me motivin, prokuroria, thotë se bëhet fjalë për një konflikt që ish-polici Serezi kishte me viktimën. Në kohën që ishte pjesë e policisë, Serezi është arrestuar gjatë tentativës për të trafikuar një ton hashash. Mendohet se Memli Begalla i kishte premtuar atij, që nëse kapej nga policia, ta ndihmonte për të dalë nga burgu, por nuk e ka mbajtur fjalën. Pas lirimit nga burgu, i pandehuri ka tentuar disa herë ta takonte Begallën, madje i ka kërkuar edhe para borxh, pasi ishte në vështirësi ekonomike. Të gjitha pretendimet e prokurorisë janë rrëzuar nga ish-polici. Megjithatë, dosja penale ndaj tij dhe Denis Demirit, i është dërguar gjykatësit paraprak dhe pritet të kalojë së shpejti për gjykim.
