Mashtrim me naftën, karburant i përzier me substanca të tjera dhe ujë i gjetur në maune që supozohej të ishin të mbushura me naftë.
Një skemë mashtrimi mes Shqipërisë dhe Kosovës, për të cilën SPAK nuk konfirmon dhe as mohon nëse ka nisur një hetim penal. Çështja del nga të dhënat e publikuara në Regjistrin e Kërkesave dhe Përgjigjeve të SPAK për muajin shtator 2026.
Kërkesa për informacion që i është drejtuar Prokurorisë së Posaçme vjen nga një media nga Kosova. Kjo media e pyet SPAK nëse po bashkëpunon me Prokurorinë Speciale të Kosovës për të hetuar këtë skemë mashtrimi, nëse ka një skuadër të përbashkët prokurorësh që po hetojnë këtë çështje për naftën e përzier apo substanca të tjera qe mund të kenë hyrë në Shqipëri përmes Portit të Durrësit ose pikave të tjera kufitare, me destinacion final Kosovën. Një nga pikëpyetjet kryesore lidhet me faktin se si përfundoi ujë në maune që supozohej të ishin të mbushura me naftë.
Në fokus janë edhe kompanitë me bazë në Shqipëri që mund të jenë nën hetim apo ndaj të cilave mund të jenë marrë masa hetimore, përfshirë sekuestron preventive. Çështja prek gjithashtu dyshimet për përfshirjen e mundshme të zyrtarëve të doganave, inspektorateve, ministrive apo institucioneve të tjera përgjegjëse për kontrollin dhe mbikëqyrjen e tregtisë së derivateve.
Një tjetër element që ka tërhequr vëmendjen e medias nga Kosova është dëmi i mundshëm financiar ndaj buxhetit të shtetit përmes shmangies së taksave, akcizës apo detyrimeve të tjera fiskale. Kërkohet të dihet gjithashtu nëse për këtë çështje ka persona të ndaluar, arrestuar, shpallur në kërkim apo persona ndaj të cilëve është caktuar masë sigurimi në Shqipëri.
Por SPAK, në përgjigjen e dhënë më 2 tetor, nuk konfirmon dhe as mohon ekzistencën e një hetimi për skemën e dyshuar të mashtrimit me naftë.
“Të dhënat në Regjistrin e Njoftimeve të Veprave Penale i nënshtrohen sekretit hetimor. Për rrjedhojë, nuk është e mundur të konfirmojmë ose të mohojmë regjistrimin e një kallëzimi apo ekzistencën e një procedimi penal”, thuhet në përgjigjen e Prokurorisë së Posaçme. /Top Channel/
