Gjykata e Lartë vendosi të lërë të lirë deputetin e përjashtuar nga Partia Socialiste Tom Doshi. Vendimi është marrë ditën e sotme, ky gjykata vendosi të pranojë kërkesën e deputetit Doshi, duke i ndryshuar masën nga “arrest shtëpie” në masën “detyrim paraqitje”.
Në seancën gjyqësore, deputeti Doshi ka kërkuar lirinë, me pretendimin se akuzat e ngritura ndaj tij nuk ekzistojnë.
Në dalje nga seanca deputeti Doshi u shpreh i pakënaqur me vendimin, duke theksuar se sipas tij Kryeministri Rama dhe Kryeparlamentari Meta po i bëjnë presion gjykatës. Sipas tij Rama i ka braktisur socialistët duke punuar vetëm për Metën, ndërsa shtoi se kryeministri e ka mendjen të shijojë pushtetin.
Doshi bëri të ditur gjithashtu se nuk do të shkojë në seancën parlamentare të së enjtes.
Unë jam i pakënaqur edhe me vendimin e parë dhe atë të sotëm. Asnjë nga akuzat nuk ekziston. Pavarësisht se Prokurori i Përgjithshëm, Kryeministri dhe Kreu i Kuvendit po i bëjnë presion gjykatës. Nuk dua të shkoj në Kuvend. Pres Prokurorinë që të marrin vesh të vërtetën. Rama po shijon pushtetin, nuk i interesojnë zgjedhjet vendore. Rama i ka braktisur socialistët, ai po punon vetëm për Ilir Metën.
Edhe avokati i tij Vladimir Meçe u shpreh se nuk ishin të kënaqur me vendimin. Sipas tij sistemi i drejtësisë vazhdon të jetë nën presionin e politikës.
“Gjykata vendosi detyrim paraqitje. Ne nuk jemi të kënaqur me vendimin e gjykatës, edhe pse ky është një lajm i mirë. Kjo ka të bëjë me sistemin e drejtësisë në Shqipëri. Gjykata demonstroi se është nën presionin dhe trysninë e politikës, dhe kjo na bën të vazhdojmë luftën tonë. Patjetër që Doshi do të rikthehet në Kuvend. “ tha avokati Vladimir Meçe
Në këtë mënyrë, pas rreth 1 muaji në arrest shtëpie deputeti Doshi ka fituar lirinë, ndërsa do t’i duhet të paraqitet në gjykatë çdo të hënë në orën 10:00. Ai u vu nën akuzë për kallëzim të rremë lidhur me pretendimin e Doshit se ndaj tij është organizuar një atentat për ta eleminuar fizikisht atë dhe kolegun demokrat Mhill Fufi.
Doshi në Gjykatë, kërkon lirinë
Deputeti Tom Doshi është paraqitur sot në Gjykatën e Lartë për të kërkuan lirinë. Doshi është parë të hyjë në gjykatë në shoqërinë e avokatëve të tij ndërsa pritet të kërkojë ndryshimin e masës së dënimit nga “arrest shtëpiak” në gjykim në gjendje të lirë.
Trupi gjykues pritet të shqyrtojë kërkesën e avokatëve ndërsa Doshi akuzohet për sajimin e një skenari për vrasjen e deputetëve. Kërkesa në fjalë do të gjykohet nga i njëjti Kolegj Penal që caktoi masën e arrestit në shtëpi një muaj parë.
