Dortmundi ka fituar derbin numër 147 të Ruhrit, ndërsa ka mundur Schalken 3-2 në “Signal Iduna Park”. Skuadra e Tuchel, falë kësaj fitoreje, ka arritur të ruajë diferencën prej pesë pikësh me kryesuesit e Bundesligës, Bayern Munich, që ka fituar gjithashtu këtë fundjavë.
Për sa i takon ndeshjes, goli i parë është realizuar nga miqtë, me Kagawa që ka shënuar në minutën e 30-të të takimit. Reagimi i miqve ka ardhur tri minuta më pas me Huntelaar, para se Ginter të rikthente në avantazh verdhëzinjtë dy minuta para fundit të pjesës së parë.
Në pjesën e dytë, në minutën e 48-të, Aubameyang ka çuar shifrat në 3-1 dhe ka kapur Robert Lewandowskin në renditjen e golashënuesve me 14 gola të realizuar në Bundesliga. Schalke nuk është dorëzuar dhe në minutën e 71-të, falë një gabimi të mbrojtjes, ka qenë përsëri Huntelaar, i cili ka ngushtuar diferencat për miqtë.
Borussia, megjithatë, ka arritur të mbrojë avantazhin deri në fund, duke siguruar fitoren e 9 në kampionat dhe të katërtën radhazi pas humbjes së rëndë 5-1 të pësuar në fushën e Bayern Munich 4 tetorin e kaluar. Kampionët e Gjermanisë në fuqi kryesojnë kampionatin me 34 pikë, ndërsa Dortmund ndodhet në vendin e dytë me 29 pikë.
