Policia e Shtetit ishte pjesë e një operacioni ndërkombëtar për goditjen e një grupi hakerash të cilët infektuan rreth 500 mijë IP në të gjithë botën me virusin “Dorkbot malware”. Në aksion merrnin pjesë sektorët kundër krimit kibernetik, në policitë e 36 vendeve përfshirë dhe Shqipërinë.
Sipas të dhënave, rezulton se nga ky virus janë sulmur sistemet kompjuterike të 224 shteteve. Janë konstatuar 1.427 ndërhyrje me persona të prekur, si dhe 475.532 IP të infektuara.
Njoftimi i Policisë
KOMUNIKATË PËR SHTYP
- Operacion ndërkombëtar kundër piratëve të informatikës
- Policia shqiptare pjesë e hetimit mes 36 shteteve
Në kuadër të operacionit ndërkombëtar “Dorkbot malware”, në bashkëpunim me EUROPOL dhe FBI-në, Sektori për Krimet Kompjuterike në Drejtorinë e Policisë së Shtetit, si edhe Prokuroria e Rrethit Gjyqësor Tiranë, kryen regjistrimin e procedimit penal për veprat penale të “Ndërhyrjes në sistemet kompjuterike” dhe “Keqpërdorim të paisjeve”, të parashikuara nga nenet 293/c dhe 293/ç të Kodit Penal.
Duke koordinuar veprimet nëpërmjet EUROPOL-it, në datë 3 dhjetor 2015 në orën 13:00, u bë ndërhyrja në të njëjtën kohë në 36 shtetet pjesmarrëse në këtë operacion, duke nxjerrë jashtë funksionit serverat, të cilat ishin objekt hetimi.
Gjatë hetimeve janë ekzaminuar të dhënat e gjetura nga viruset “Dorkbot malware” dhe janë identifikuar 1.427 ndërhyrje, me shtetas të prekur në 225 shtete në mbarë botën, si dhe 475.532 IP të infektuara nga këto viruse.
Po punohet për dokumentimin e plotë të kësaj veprimtarie kriminale.
