Zv Ministri i Brendshëm Ilirjan Mustafaraj ka dhënë dorëheqjen, akt i cili lidhet me mbushjen e moshës për pesion. Zëvendësuesi i Mustafarajt do të jetë Ilir Marko, i cili më parë ka mbajtur pozicionin e Drejtorit të Inspektimit në Ministrinë e Punëve të Brendshme.
Kush është Ilirjan Mustafaraj
Zoti Ilirjan Mustafaraj u lind në 9 shkurt 1951, në Gjirokastër. Ai është i martuar dhe ka dy fëmijë. Mustafaraj është diplomuar në degën Inxhinieri Mekanike, në Fakultetin e Inxhinierisë në vitin 1973. Në vitin 1977, ai kreu një kurs 1 vjeçar për “Shërbim Informacioni” pranë Ministrisë së Punëve të Brendshme.
Në periudhën 1981 – 1984, përfundoi shkollën e Lartë (pa shkëputje nga puna) pranë Ministrisë së Punëve të Brendshme. Mustarafaj ka kryer gjithashtu një kurs 2 vjeçar për Drejtues i Lartë Administrativ, si edhe disa trajnime në fushën e policimit në Norvegji, Danimarkë e SHBA.
Ka drejtuar nga shkurti deri në nëntor, degën e Qarkullimit Rrugor në MPB, në vitin 1984. Ndërsa nga 1984 deri në 1990, mbajti postin e zv/ministrit të Punëve të Brendshme, për Policinë.
Për 2 vite me rradhë ishte Kryeinspktor në Drejtorinë e Trajtimit të Mallrave, pranë Ministrisë së Transporteve.
Në maj 1992, del në asistencë dhe për një periudhë 5 vjeçare ishte Këshilltar pranë një Policie private dhe drejtor i një Autoshkolle private.
Nga shtatori 1997 deri në dhjetor 1998, mban postin e Shefit të Sektorit të Policisë Rrugore. E më pas deri në vitin 2000, emërohet shef i Sektorit Ekonomik në Ministrinë e Rendit Publik.
Nga janari deri në maj 2001, z. Mustafaraj ishte drejtor i Kontrollit Ekonomik Financiar.
Në maj 2001 deri në janar 2003, ishte Drejtor i Antiterrorit në Shërbimin Informativ Shtetëor
Më pas, ai ishte Këshilltar i Ministrit të Rendit Publik, deri në tetor 2003.
Në vitin 2004, ishte Këshilltar i Jashtëm i kompanisë INTERSIG.
Nga 2010 deri në tetor 2013, ishte këshilltar i Ministrit të Brendshëm.
Që nga 5 tetori 2013, është emëruar zëvendesministër i Punëve të Brendshme.
