EKSKLUZIVE JAVANEWS/ Mandati i deputeti të dorëhequr tashmë, Mark Frroku, pritet të shkojë në Kolegjin Zgjedhor. Shkak për këtë duket se është fakti se këtë mandat në listën e Partisë Kristian Demokrate e pretendojnë dy individë. E para është Mirela Ferracaku e cila vjen e treta në listën e kësaj partie, ndërsa i dyti pretedent është Ndok Kola, i cili renditet i katërti në këtë listë. Po cila është pika që ka ngjallur debat mes dy pretendetëve për mandatin e Frokkut? Është pikërisht neni 164 i Kodit zgjedhor, i cili interpretohet në forma të ndryshme nga ana e dy pretendetëve.
Sipas këtij neni mandati i ndërprerë i kalon kandidatit vijues të së njëjtës parti politike në zonën zgjedhore përkatëse. Por, sipas pretendimit të Kolës, neni 164 parashikon zëvendësimin brenda gjinisë mashkullore. Pra meqë z. Frroku që deri dje gëzonte mandatin dhe i përket gjinisë mashkullore, për rrjedhim edhe zëvendësimi duhet bërë brenda gjinisë.
Si i tillë në zbatim të kodit zgjedhor të Republikës së Shqipërisë pas dorëheqjes së deputetit kristiandemokrat, deputet vijues i takon avokatit 38 vjeçar z.Ndok Kola i ardhur nga qarku Shkodër. Por sa bazë do të kenë pretendimet e tij?
Duke lexuar Kodin në plan të parë duket se e drejta i takon Kolës. Por a do mund të bëhet një kapërcim i tillë, kur nga ana tjetër Kodi detyron partitë që në renditjen në listë të jenë të përfaqësuara edhe femrat në rreshtin e tretë të renditjes? Është pikërisht ky shkaku që palët mesa duket do ti drejtohen KQZ me pretendimin se mandati i tyre i takon Frrokut. E në rast se njëra nga palët nuk bie dakord atëhere çështja do të kaloj në Kolegjin zgjedhor ku do të merret edhe vendimi përkatës. (javanews.al / Me. Ar)
Neni 164 i Kodit Zgjedhor / Pika 2
Mandati i ndërprerë i deputetit ose i anëtarit të këshillit të bashkisë i kalon kandidatit vijues të listës së të njëjtës parti politike në zonën zgjedhore përkatëse. Në përjashtim nga ky rregull, kur vakanca i përket një mandati të fituar sipas pikës 6 të nenit 67, ajo plotësohet nga kandidati i parë në listë i gjinisë përkatëse, pavarësisht renditjes në listë. Emrat e tjerë të asaj gjinie ngjiten në listë duke marrë renditjen e kandidatit paraardhës të së njëjtës gjini. Ky rregull nuk aplikohet kur emrat e gjinisë përkatëse kanë shteruar.
