Peshëngritja shqiptare edhe njëherë po kalon momente mjaft të vështira. Skandali i fundit që lidhet me dopingut do t’i kushtojë shtrenjtë Shqipërisë pasi Federata Evropiane e Peshëngritjes i ka hequr të drejtën Shqipërisë të organizojë Evropianin që mbahet në muajin Mars.
Ky vendim vjen në një kohë kur Federata Shqiptare është përfshirë nga kaosi pasi është dorëhequr Bordi Ekzekutiv i Federatës Shqiptare për shkak të problemit të përsëritur të dopingut me sportistët shqiptarë.
Ky, sipas komunikatës së Federatës europiane në rrjetin social “Facebook”, është një problem i papritur me të cilin përballen vet EWF-ja, por edhe federatat anëtare të saj.
Sa i përket zgjidhjes së këtij problemi, Federata Europiane e Peshëngritjes ka dy mundësi zgjidhjeje: ose të gjejë një tjetër vend organizator, ose të shtyjë organizimin e Europianit për t’i dhënë më shumë kohë vendit të ri për përgatitjet e organizimit të tij.
“Prioriteti ynë parësor është organizimi i kompeticionit në kohën e përcaktuar më parë, pra nga 26 marsi deri në 1 prill. Ndaj, Federata Europiane e Peshëngritjes po negocion me disa vende anëtare për të vendosur vendin e ri organizator. Do t’iu njoftojmë për zhvillimet e reja në vijim”, thuhet në komunikatën e EWF-së./a.m.
