Organizata Trump ka njoftuar nisjen e një shërbimi të ri celular dhe një smartphone të personalizuar me emrin e Presidentit të Shteteve të Bashkuara të Amerikës.
“Përgatituni të përjetoni fuqinë e Trump Mobile”, thuhet në faqen zyrtare të shërbimit, krahas një fotografie ku shfaqet një telefon i artë.
I pozicionuar si alternativë ndaj gjigantëve të telekomunikacionit si AT&T dhe T-Mobile, ky projekt synon konsumatorët konservatorë, me premtime për produkte të prodhuara në SHBA.
“Do të prezantojmë një paketë të plotë produktesh,” deklaroi Donald Trump Jr., djali i madh i Presidentit Trump, gjatë prezantimit zyrtar të mbajtur në Trump Tower në Nju Jork të hënën.
Paketa do të përfshijë edhe shërbime si telemjekësia, asistenca rrugore dhe mesazhe të pakufizuara drejt 100 vendeve, shtoi ai.
Organizata Trump, që mbulon pjesën më të madhe të bizneseve të Presidentit, njoftoi se drejtimi i kompanisë bëhet nga fëmijët e tij për shkak të detyrës së Donald Trump në krye të Shtëpisë së Bardhë.
Ky është i njëjti model që u ndoq edhe gjatë mandatit të tij të parë presidencial, ndonëse kanë vazhduar shqetësimet për konflikt të mundshëm interesi.
Në vitet e fundit, familja Trump, e njohur më parë për hotelet luksoze dhe fushat e golfit, ka hyrë në sektorë të rinj si media dixhitale dhe kriptomonedhat.
Telefoni i ri i markës Trump pritet të dalë në treg në muajin Shtator, me një çmim prej 499 dollarësh, ndërsa abonimi mujor në rrjet do të kushtojë 47.45 dollarë.
