Në shkurt 2024, një aksion i Guardia di Finanza në një magazinë të braktisur në zonën industriale të Villaggio Vecchio tronditi qytetin. Dyshohej për një operacion të madh antidrogë, por për muaj me radhë nuk dolën detaje.
Sot, 17 qershor 2025, 12 persona u arrestuan në Pescara, nën akuzë për prodhim, trafikim dhe posedim të lëndëve narkotike.
Hetimet e drejtuara nga Drejtoria Antimafia e L’Aquilas dhe Karabinierët e Pescara zbuluan një organizatë kriminale që më së shumti përbëhej nga shqiptarë.
Rrjeti kriminal e kishte bazën në Abruzzo, ndërsa “degët” ishin zgjeruar në Milano, Brescia, Varese dhe Cremona. Magazina e sekuestruar në Piadena Drizzona ishte një nga vendet kryesore ku kultivohej marijuana.
Deri më tani janë sekuestruar 421 kg marijuanë dhe 2 kg kokainë. Droga transportohej me furgonë të marrë me qira nga Lombardia në Abruzzo. Fitimet dërgoheshin kryesisht në Shqipëri, ndërsa për të komunikuar me njëri-tjetrin përdornin karta SIM në emër të personave të tjerë dhe aplikacione të koduara.
Pas muajsh heshtjeje, arrestimet e sotme zbërthyen të gjithë aktivitetin kriminal nga Italia qendrore në pjesën veriore të vendit.
