Opera e Dubait po përgatitet për hapjen e madhe! ka shkruar gazeta “The National” në Abu Dhabi para ceremonisë madhështore të përurimit të shtëpisë operistike, që do të mbahet sot më 31 gusht.
Organizatorët e kësaj ngjarjeje, kanë gjetur një personalitet ideal për ta inauguruar hapjen e Operës – një zë të pagabueshëm të respektuar në të gjithë komunitetin klasik botëror. Është ky maestro Placido Domingo, tenori spanjoll me famë botërore, i cili do ta hap këtë shtëpi opertistike me një koncert me vepra të zgjedhura.
Biletat për koncert janë shitur disa javë përpara ceremonisë për shkak të interesimit të madh për ta ndjekur këtë ngjarje, shkruan KultPlus.
Shtëpia e Operës në Dubai është e vendosur në bazamentin e kullës më të lartë në botë, Burj Khalifa. Ndërtesa ka pamjen e një varke prej druri që përdoret për transportin detar tradicional.Ajo ka një sallë me kapacitet për dy mijë njerëz që mund të përdoret si teatër, sallë koncertesh apo edhe hapësirë për ngjarje të tjera.
Domingo ka thënë për The National” në Abu Dhabi se është absolutisht i kënaqur dhe i nderuar që të jetë pjesë e kësaj hapjeje të pritshme dhe që të shtojë edhe një debutim në një tjetër shtëpi të mahnitshme operistike. /r.a
