Monedha vendase ka shënuar një tjetër mbiçmim dje ndaj euros, ndërsa është zhvlerësuar ndaj dollarit. Sipas kursit zyrtar të Bankës së Shqipërisë, një euro u këmbye sot me 135.49 lekë, duke rënë me 0.09 lekë në raport me një ditë më parë. Ky është jo vetëm një rekord i ri minimal i këtij viti, por edhe niveli më i ulët që nga gushti 2010, kur monedha e përbashkët këmbehej me 135.32 lekë.
Në të kundërt, dollari ka fituar pikë, duke u këmbyer me 129.16 lekë, me një rritje të fortë prej 1.67 lekësh në raport me ditën e mëparshme. Lëvizjet në tregun ndërkombëtar janë faktori kryesor që ka ndikuar në këtë tendencë. Pas vendimit të Rezervës Federale për rritjen e interesave në mbledhjen e fundit dhe sinjaleve për një ritëm më të shpejtë rritjeje në 2017-n, dollari kërceu në nivelin më të lartë kundrejt euros në një dekadë.
Euro ra me 1% në $1.0408, niveli më i ulët që nga fillimi i vitit 2003. Në forcimin e dollarit ka ndikuar diferenca mes normave referencë të interesit në botën e zhvilluar në favor të monedhës rezervë globale. Në Shqipëri, euro ka qenë e dobët prej disa muajsh edhe për faktorë të brendshëm, ku më kryesorja është oferta e lartë e monedhës së përbashkët.
Përgjithësisht edhe në periudhën nga 14-20 të çdo muaji ka një rritje të ofertës në euro, teksa kompanitë e mëdha, ku një rol kryesor po luan gazsjellësi TAP, po këmbejnë valutën për të paguar TVSH-në dhe sigurimet shoqërore e shëndetësore. Aktorët e tregut presin që euro të jetë e dobët deri në fund të vitit, teksa pas datës 20 pritet të shtohen prurjet e valutës nga emigrantët që vijnë për festat e fundvitit.