Kreu i Partisë Demokratike Lulzim Basha është pro vendimit të kryeministrit Edi Rama i cili ka pranuar kërkesën e SHBA-së për strehimin e afganëve në vendin tonë.
Ai është shprehur se duke qenë se Shqipëria është anëtare e NATO-s, është detyrë e saj të qëndrojë pranë partnerit tonë strategjik SHBA dhe aleatëve në zgjidhjen e krizës humanitare që po precipiton në Afganistan.
“Rreziqet mbi identitetin tonë kombëtar, si pasojë e shpopullimit të Shqipërisë, nuk lindin si pasojë e zgjidhjeve strategjike në kuadër të NATO-s dhe bashkëpunimit strategjik me SHBA, por për shkak të keqqeverisjes së pakicës që e ka bërë vendin të pajetueshëm për qytetarët.
Sikurse është detyra jonë të jemi në lartësinë e angazhimeve ndërkombëtare, është po ashtu detyra jonë të jemi në lartësinë e sfidave që ka Shqipëria, për të patur një qeveri që punon për njerëzit dhe mbështet aspiratat e tyre legjitime për të jetuar me dinjitet dhe mirëqenie në vendin e tyre.”, shkroi Basha dje në rrjetet sociale.
Mirëpo, kjo deklaratë e Bashës nuk është pritur aspak mirë nga demokratët, jo për shkakun se është pro ardhjes së shtetasve afganë, por për shkak se herë pas here vërteton se është në krah të Ramës.
Ata kanë reaguar ashpër në rrjetin sociale të Bashës, duke e cilësuar si tradhtarë dhe hajdut.
