EKSKLUZIVE/ Kur flitet për përgjimet, Presidenti, Bujar Nishani, duket se duhet të jetë i fundit në rradhë për të folur për “përgjime të paligjshme”. Ai rezulton të jetë i pari Ministër i Brendshëm i vënë nën hetim parlamentar me akuzën “Për përgjime të paligjshme”. Dhe si për ironi të fatit jo vetëm nga deputetët e opozitës së atëhershme, por edhe nga vetë deputetë të grupit të tij parlamentar të PD-së. Në kohën që ai ka qenë Ministër i Brendshëm, në periudhën 2007- 2009, Ministria e Brendëshme që ai drejtonte është akuzuar në mënyrë të drejtpërdrejtë nga deputetët e Kuvendit për “përgjime të paligjshme të deputetëve”. Për këtë madje është ngritur edhe një komision hetimor parlamentar. Javanews ka arritur të sigurojë në zyrat e Kuvendit kërkesën e një grupi prej mbi 35 deputetësh, të të gjitha krahëve politik, të cilët kërkonin ngritjen e një komisioni hetimor parlamentar me objekt hetimin “Mbi përgjimet e paligjshme të telefonatave”.
Në qendër të akuzave për për përgjime të paligjshme ishte Ministria e Brendëshme e drejtuar në atë kohë nga Nishani, aktualisht President i Republikës. Në kërkesën drejtuar kryetares së atëhershme të Kuvendit, Jozefina Topalli, që mban datën 27/09/2007, shpjegohet edhe objekti i punës së këtij komisioni hetimor parlamentar.
“Objekti i punës së këtij komisioni do të jetë zbardhja e plotë e motiveve, arsyeve dhe bazës ligjore në iniciativën e ndërmarrë (nga struktura të caktuara) për përgjimin e telefonave të deputetëve nga ana e strukturave të veçanta, kryesisht të Ministrisë së Brendëshme”, nënvizohet në kërkesën e bërë nga grupi i deputetëve që kërkonin ngritjen e këtij komisioni, që disponon JAVANEWS.
Siç del edhe nga kërkesa zyrtare e bërë nga deputetët e Kuvendit, subjekt i këtyre përgjimeve të paligjshme të bëra kryesisht nga Ministria e Brendëshme e drejtuar nga Nishani, kanë qenë vetë deputetët. Ky fakt nënvizohet edhe në këtë shkresë.
“Ju vëmë në dijeni se dyshimi dhe shqetësimi ynë ka ardhur pas disa raportimeve në media për përgjime telefonike dhe survejime të deputetëve të caktuar të Kuvendit Shqiptar. Këto raporte janë konfirmuar (privatisht) nga informacione të marra në rrugë operative nga zyrtarë të ndryshëm”, theksohet në dokumentin zyrtar që kërkonte ngritjen e këtij komisioni hetimor.
Deputetët e të gjitha palëve politike që kanë firmosur kërkesën për ngritjen e këtij komisioni hetimor tërheqin vëmendjen se përgjimet dhe survejimi i personave me imunitet është një veprim jo kushtetues, dhe kur ai bëhet në mënyrë të paligjshme bie ndesh me të drejtat dhe liritë e njeriut.
“Me anë të këtij hetimi parlamentar, shpresojmë sqarimin e kësaj çështje, duke mos besuar apriori, se këto veprime janë manovra të ulta politike, për të bërë presion mbi deputet të caktuar, me qëllim denigrimin apo ndoshta dhe kërcënimin e tyre politik”, nënvizohet në këtë kërkesë zyrtare të deputetëve, që disponon JAVANEWS.
Sipas deputetëve, ngritja e këtij komisioni vlerësohet si një garanci institucionale për forcimin e shtetit ligjor dhe funksionimin e pluralizmit politik në vend. Deputetët propozojnë që Komisioni Hetimor të përbëhet nga 9 anëtarë 5 përfaqësues të shumicës dhe 4 nga pakica parlamentare dhe që hetimi të kryhet brenda një përiudhe 3 mujore.
Sabotimi i komisionit hetimor “Për përgjimet e paligjshme”
Menjëherë sapo ky komision hetimor nisi nga puna, në të njëjtën kohë duket se filloi edhe puna për sabotimin e tij, duke filluar që nga krerët më të lartë të Kuvendit, e deri tek institucionet, të cilat ishin subjekt i këtij hetimi. Kjo provohet edhe në shkresën që deputetët anëtarë të këtij komsioni i nisën Kryesis së Kuvendit, ku kërkonin shtyrjen e afatit të veprimtarisë së komision it hetimor.
“Disa ditë më parë në mbledhjen e Komisionit ne vendosëm në mënyrë unanime që t’i kërkojmë parlamentit zgjatjen e mandatit tre mujor të komisionit. Kërkesa për një mandat shtesë lidhet me disa motive objektive dhe subjektive. Objektive është fakti se puna e komisionit u bllokua dhe u vonua për mëse dy javë nga administrata e Kuvendit, e cila nuk realizoi detyrimin e saj ligjor për dërgimin e pyetësorëve tanë në institucionet përkatëse shtetërore. Kjo vonesë është tashmë e dokumentuar dhe është bërë prezent edhe pranë organeve drejtuese të parlamentit. Nëse administrata do të ishte treguar korrekte me ligjin dhe rregulloren e punës së Kuvendit, atëherë Komisioni do të ishte shumë pranë fazës së përfundimit të aktivitetit të tij”, thuhet në kërkesën e deputetëve që kërkonin shtyrjen e afateve të punës së këtij komisioni.
Një tjetër pengesë në punën e komisionit ishte dhe miratimi i ekspertëve. Nga 4 ekspertë që, sipas ligjit, duhej të kishin certifikatën e sigurisë, deputetët e shumicës së atëhershme miratuan vetëm 1 duke zvarritur miratimin e 3 ekspertëve të tjerë duke bërë thuajse të pamundur punën efektive të këtij komisioni. Kjo nënvizohet edhe në kërkesën ku kërkohet shtyrja e afateve kohore.
“Ne kemi nevojë për më shumë kohë për të verifikuar raportet zyrtare të institucioneve përkatëse dhe pretendimeve të vetë deputetëve, si dhe për të bërë ballafaqimin përkatës, sipas nevojave dhe kërkesave të vetë anëtarëve dhe objektit të Komisioni”, thuhet në këtë dokument.
Por kërkesa e deputetëve për shtyrjen e afatit për hetim parlamentar mbi “përgjimet e paligjshme” nuk u mor në vlerësim nga shumica e atëhershme e PD-së, pjesë e së cilës ishte edhe Presidenti Nishani, në atë kohë ministër i Brendshëm, institucioni i të cilit ishte në qendër të akuzave për përgjime të paligjshme, gjë që çoi edhe në ngritjen e komisionit hetimor parlamentar.
(Javanwes.al) Armando Meta
