Nga të gjashtë vendet e Ballkanit Perëndimor, Shqipëria është vendi që ka përfituar më shumë fonde nga Bashkimi Europian, zbulojnë një numër dokumentash zyrtarë të Bashkimit Europian, të siguruar nga Lexo.al. Këto të dhëna bien në kundërshtim me “Fake News” e qarkulluar ditën e sotme në disa portale të ndryshme, ku shkruhej se vendi ynë ishte i vetmi nga të gjithë vendet e Ballkanit që nuk kishte përfituar asnjë qindarkë, nga më shumë se një miliardë euro të vendosura në dispozicion nga BE për zhvillimin e ardhshëm të rajonit tonë. Konkretisht, Samiti i Triestes u parapri në muajin mars nga një takim në Stokholm, Suedi, ku të gjashtë vendet tona prezantuan projektet e tyre per financim.
Shqipërisë iu aprovuan në total 5 projekte, por ajo që bie në sy është se vendi ynë siguroi plot 30% të fondit total të vendosur në dispozicion për Ballkanin Perëndimor, më shumë se çdo vend tjetër dhe katër herë më shumë se Serbia, e cila siguroi vetëm 7% të fondit total.
Në total, Bashkimi Europian aprovoi një grant prej 3,35 milionë eurosh për Shqipërinë, para që përdoren për të realizuar studimet e fizibilitetit të pesë projekteve të propozuara, projekte të cilat më pas do të marrim financime të BE-së për realizimin e tyre.
Pesë projektet e reja të aprovuara nga BE kanë të gjithë një rëndësi kritike për zhvillimin e vendit tonë, pasi bëhet fjalë për HEC-in e Skavicës (projekt i cili ka potencialin të dyfishojë kapacitetin energjitik të vendit), për Parkun Kombëtar të Bunës dhe Liqenit të Shkodrës, linjën e tensionit të lartë me Maqedoninë, zgjerimin e Portit të Durrësit dhe by-pasi rrugor i Lezhës.
Në vitin 2016, Shqipëria ishte i treta në rajon për përthithjen e këtyre fondeve, duke marrë 24% të fondit të përgjithshëm të vendosur në dispozicion. Tre projektet e aprovuara një vit më parë janë gazsjellësi Adriatiko-Jonian, gazjsellësi Shqipëri-Kosovë-Serbi dhe hekurudha Vorë-Hani i Hotit.
Ndërkohë, nga Samiti i Parë i Berlinit, i mbajtur në 2014-n me nismën e vetë Kancelares Merkel, deri në Samitin e Sotëm të Triestes, Shqipëria ka marrë mbështetjen e BE-së për një numër të rëndësishëm projektesh të tjerë.
Midis tyre është edhe hekurudha Tiranë-Rinas-Durrës, si dhe projekti për Korridorin e Kaltër, një autostradë që do të lidhë Kroacinë me Greqinë, duke kaluar veri-jug përmes të gjithë territorit të Shqipërisë.
Gjithashtu, falë një granti të BE-së, Shqipëria ka të përfunduar Masterplanin Kombëtar të Gazit, projekt që do të nisë nga zbatimi pas përfundimit të gazjellësit TAP.
Përfitime të mëdha, në vlerën e miliona eurove në vit mund të rrjedhin edhe nga themelimi i Qendrës së Shkëmbimeve Studentore dhe Kulturore (RYCO) në Tiranë, një qendër e cila shndërron Tiranën në kryeqendrën e shkëmbimeve rinore në Ballkan. Kjo qendër ka nisur funksionin, por do të fillojë punëm me ritëm të plotë vetëm në fillim të 2018-s.
Në total, Bashkimi Europian ka vendosur që të investojë në Ballkanin Perëndimor mbi një miliardë eurosh, në formë granti, kredish të buta përmes BERZH-it apo KfW, fondesh IPA apo donacione të tjera, për financimin e Axhendës së Konektivitetit.
Këtij fondi, do t’i shtohen edhe 220 milionë euro, që Komisioneri Hahn bëri të ditur ditën e sotme se do të shpërndahen midis më shumë se 6 mijë kompanive vendase në Shqipëri dhe vendet e tjera të rajonit – https://europeanwesternbalkans
Konsulto të dhëna të tjera zyrtare –
Deklarata e perbashket 6 kryeministrave ne 2016-n – https://ec.europa.eu/commissio
Harta e projekteve në Samitin e Parisit, linku i Ministrisë së Punëve të Jashtme të Francës – http://www.diplomatie.gouv.fr/
/Lexo.al
