Juristi Sokol Hazizaj ka komentuar draftin e prezantuar për Kodin e ri Penal, duke e cilësuar atë si të papërpunuar dhe të shkëputur nga konteksti shqiptar.
Në një deklaratë të drejtpërdrejtë për “News24”, Hazizaj u shpreh se projekti aktual përmban mangësi serioze në strukturë dhe përmbajtje.
“Kodi i ri ka shumë ndryshime nga kodi aktual penal. Sot kemi 925 dispozita, ku pjesa më e madhe kalojnë kufirin prej 300 fjalësh, gjë që e bën të rënduar dhe të paefektshëm në praktikë,” tha ai.
Hazizaj theksoi se ky draft është më shumë një përmbledhje e elementëve të huaj sesa një produkt ligjor i përshtatur për realitetin shqiptar.
“Ky është një dokument i papërpunuar mirë, një kopje e disa modeleve të huaja, nga kodi italian, tek ai holandez apo danez. Por ajo që mungon është fryma dhe tradita juridike shqiptare,” shtoi ai.
Sipas juristit, mungesa e një karakteri kombëtar dhe përshtatja e pamjaftueshme me realitetin shoqëror dhe ligjor të Shqipërisë përbën një rrezik të madh në zbatimin praktik të kodit.
