Edicioni 14-të i “DokuFestit” do të mbahet prej 8 deri më 16 gusht, ndërkaq programi i plotë i filmave do të bëhet publik më 18 korrik.
Gjashtë filma dokumentarë të filmbërësit të ndjerë amerikan Albert Maysles do të zënë vend në ekranin e madh të edicionit të sivjetmë në “DokuFest”. Maysles, i cili vdiq në fillim të këtij viti në moshën 88-vjeçare, prapa vetes la një bagazh të madh me krijime filmike. Për të nderuar kontributin e tij në botën e filmit, festivali ndërkombëtar i filmit dokumentar dhe të shkurtër “DokuFest” ka shpallur programin homazh në kujtim të Maysles, që, siç e ka përshkruar “DokuFesti” në komunikatën që ka dërguar të enjten, “vinte nga linja e gjatë e filmbërësve në kërkim të së vërtetës, i cili ishte inspirim për shumë të tjerë që erdhën pas tij”.
Programi përfshin shfaqjen e filmave si ai që shfaq historinë qesharake dhe të sinqertë e mbërritjes së “Beatles” në Amerikë në shkurt të vitit 1964 me titullin “Ëhat’s Happening! The Beatles in the USA”. Më pas vjen dokumentari historik i koncertit tragjik të “Rolling Stones” në Altamont Speedëay më 6 dhjetor, 1969 “Gimme Shelter”. Do të shfaqet edhe historia e jashtëzakonshme por e vërtetë e Edith Bouvier Beale dhe vajzës së saj Edie, halla dhe kushërira e Jacqueline Kennedy Onassis, “Grey Gardens”. “Concert of the Ëills: Making the Getty Center”, është një tjetër film, i cili flet për konceptimin, konstruktimin dhe kompletimin e “Getty Center”.
Albert Maysles është njëri ndër artistët më të rëndësishëm të filmave dokumentarë modernë. Bashkë me vëllanë e tij David, ata janë të njohur si pionierët e kinemasë “direct”, versionin amerikan të “cinema veritésë” franceze. Ata fituan reputacionin e tyre të shquar duke qenë të parët që xhiruan filma të gjatë jofiktivë – filma ku drama e jetës njerëzore shpaloset ashtu siç është: pa skenar dhe pa narracion.
