Partia Demokratike përmes Enkelejd Alibeajt ka akuzuar këtë të diele zv.drejtorin e Doganave Qibini, se ka lejuar kalimin e shtetasit Emiljano Shullazi, pa kontrolluar makinën e tij.
Pas kësaj akuze Doganat kanë reaguar me anë të një deklarate, duke thënë se kjo është shpifje. Doganat kanë publikuar edhe fotot e skanimit të makinës së Shullazit.
“Drejtoria e Përgjithshme e Doganave hedh poshtë akuzat e Partisë Demokratike në adresë të Zv/Drejtorit të Përgjithshëm Besmir Qibini, që përpiqen ta lidhin atë me favorizim të personave të caktuar.
Sipas deklaratës së z.Alibeaj, me ndikimin e Zv/Drejtorit Qibini nuk është kontrolluar mjeti me të cilin shtetasi E.Shullazi udhëtonte nga Pika e Kalimit Kufitar Durrës.
E vërteta është krejt ndryshe dhe rrëzon çdo përpjekje të Partisë Demokratike për të përbaltur strukturat e shtetit.
Për hir të transparencës dhe në respekt të opinionit publik, Drejtoria e Përgjithshme e Doganave sqaron se autoritetet doganore në Durrës në bashkëpunim me strukturat e Policisë së Shtetit kanë urdhëruar skanimin e mjetit për të cilin akuzon PD, sipas procedurave standarde te punes.
Bashkëlidhur gjeni dokumentin e Urdhër-Skanimit dhe fotot e mjetit ne procesin e skanimit.
Kjo është dëshmia se përballë ligjit të gjithë janë të barabartë”, thuhet në një reagim të Doganave.
