Deputetja e Partisë Demokratike Mesila Doda, një nga nismëtaret e projekltigjit të hapjes së dosjeve nga ana e shoqërisë civile, kritikoi sot projektligjin e sjellë nga qeveria.
Replikat deputetja e PD i ka pasur me kryeministrin Edi Rama duke e akuzuar atë se hodhi poshtë propozimin e shoqërisë civile për hapjen e plotë të dosjeve, ndërsa e cilësoi projektligjin e qeverisë një skandal.
“Zoti kryeministër nuk kishe pse harxhoje paratë e taksapaguesve shqiptarë duke mos pyetur një herë të vetme. Duhej të arrihej konsensus përtej politikës, ti e pështyve dhe e hodhe në kosh propozimin e shoqërisë civile. Ligji i sjellë prej nesh kërkonte hapje dosjesh për të gjithë edhe atyre që mbajnë poste të larta duke larguar të inkriminuarit, të hapen për deputetë e ministra, gjyqtarë e diplomatë ata që kanë poste të rëndësishme, nuk ka ardhuri mbi një sistem krimi. Me anë të tij do çlirohej shteti, në të kundërt iniciativa juaj hap dosjet e viktimave, zhduk emrat e të implikuarve, nuk prek asnjë, as me majën e thoit. Këtu qendron skandali juaj. Për çfarë do i përdorni. Kjo që po sillni sot është një farsë dhe shantazh i zbardhur në letra”, tha Doda.
Duke vijuar më tej me akuzat e saj, deputetja demokrate i kujtoi kryeministrit Rama diskutimin e tij me Papa Franceskun për vuajtjet e klerit, ndërkohë që tani sipas Dodës, Rama po mbron ofiqarët e regjimit që i vranë.
Dida nuk ngurroi ta quajë Ramën aktor të një teatri që po luhet në kurriz të viktimave.
“Ti që i tregove Papa Franceskut vuajtjet e klerit të tij dhe mbron ofiqarët e regjimit që i përndoqi klerikët, vrau mijëra burra dhe gra të këtij vendi. Ti i dole sot në krah xhelatëve, i ke në qeveri, ministrin e Ramiz Alisë e ke pranë vetes, ke një ushtri xhelatësh pas vetes. Do kesh çdo ditë iniciativa parlamentare që të arrihet pastrimi i plotë i këtij vendi, do kesh me dhjetëra kërkesa përpara, që shqiptarët të kuptojnë nga kush anë fle e vërteta. Teatri yt i vetëm luhet me Gramozin dhe Xhafën ato të vënë, ato të heqin”, shtoi Doda.
Redaksia Online
(JavaNews.al)
