E ftuar në emisionin “Të Paekspozuarit”, deputetja demokrate Mesila Doda ka folur për 3 figurat politike më të diskutuar të momentit dhe jo vetëm.
Doda foli për Berishën, duke thënë së gjuha që ai përdor nuk është gjuha e politikës së re. U ndal edhe te Meta duke thënë se është korrekt, mbijetues dhe i majtë “i thekur”.
Ndrësa për kryeministrin Rama Doda tha se ai ka pasion për të bërë gjërat, por duhet të gjejë mekanizmat për të rimëkëmbur ekonominë.
“Të tre personazhet, Berishën, Metën e Ramën i njoh personalisht që në vitet ’90.
Për të kuptuar Berishën në të gjithë dimensionin e vet duhet të kalojnë disa vite.
Ka vendosur disa themele në shtetin shqiptar, por unë do vazhdoj ta shihja si një personazh që duhet të punonte për historinë dhe jo për të sotmen.
Edhe gjuha që përdor nuk i përshtatet kohës, atë që ke përballë nuk duhet ta zhdukësh, është kundërshtari yt dh jo armiku.
Ka një koncept tjetër politika sot.
Por, vazhdoj të mendoj se duhet të shkëputemi disa vjet për të kuptuar atë që ka bërë dhe nuk ka bërë në shtetin shqiptar, por është një personazh që ka drejtuar politikën shqiptare.
Sot edhe është, edhe nuk është, dhe ky është një ngërc.
Me Metën kam punuar për pak kohë dhe është shumë korrekt, është mbijetues në politikë, por eshte shumë majtas, më majtas se PS.
Rama ka një pasion, por nuk duhet të mbetet vetëm aty.
Mënyra sesi është sjellë në këto 2 vjet ka treguar se ka marrë vendime aty për aty, duke u fokusuar te imazhi.
Vetëm Rama nuk e ka besuar gjendjen e rëndë të ekonomisë dhe populli kalon ditë të vështira.
Nëse nuk shpik një mekanizëm që të ngrejë ekonominë, e ka të vështirë të ecë përpara”, u shpreh Doda.
