Kur flitet për problemet ekonomike, një ndër indikatorët tregues është edhe sasia e kursimeve që qytetarët kanë në bankë. E duket se të dhënat e këtij treguesi janë psimiste.
Muajt e fundit kursimet e qytetarëve po njohin një rënie të fortë. Sipas të dhënave të Bankës së Shqipërisë, në muajin Maj stoku total i depozitave në lekë dhe në valutë zbriti në 968 miliardë lekë, duke rënë me gati 10 miliardë lekë, ose 1 % në krahasim me muajin e mëparshëm.
Vlen të theksohet se ndikim të fortë në këtë rënie pati edhe dobësimi i euros. 70 % e rënies erdhi nga tkurrja e kursimeve në valutë. Ky është niveli më i ulët i depozitave që nga korriku i vitit 2015.
Kursimet e shqiptarëve në banka janë ulur me 33.4 miliardë lekë, ose me rreth 250 milionë euro krahasuar me gjashtë muaj më parë. Kjo rënie për 5-mujorin ka ardhur si nga ulja e depozitave në lekë, ashtu dhe në valutë. Kursimet në lekë ranë me 15 miliardë lekë, ndërsa ato në valutë u reduktuan me 18.5 miliardë lekë.
Ndërsa tkurrja e depozitave në valutë ka dhënë efektin e zhvlerësimit të euros që mesatarisht në pesë muajt e parë të vitit këmbehej me 130 lekë, nga rreth 135 lekë në të njëjtën periudhë të një viti më parë. Ndëkorhë, rënia e depozitave në monedhën vendase ka ardhur kryesisht nga ulja e kursimeve të individëve me afat në lekë.
Por, në këtë pakësim të kursimeve në banka duket se ka dhënë ndikim edhe ulja e normave të interesit të depozitave. Qytetarët tashmë nuk i shohin bankat si aleatë fitimprurës për depozitat e tyre.
Ndëkorhë, ajo që bie në sy është fakti se kursimet në valutë mbizotërojnë në sistem me plot 52.6 % të totalit, ku shumica janë euro./a.m.
