Një qen doberman është bërë heroi i një familjeje indiane, teksa është sakrifikuar për t’i shpëtuar ata nga kobrat helmuese. Ngjarja ka ndodhur në fshatin Sebekapur në rajonin Gajapati të shtetit Odisha, në lindje të Indisë.
Katër kobra mali i ishin drejtuar derës së shtëpisë, por aty u ka dalë para qeni, i cili nuk i ka lejuar.
Një gazetë lokale raporton se beteja mes qeni e kobrave ka zgjatur rreth katër orë dhe në fund të katër gjarpërinjtë kanë ngordhur, por po ashtu edhe dobermani trim, i cili nuk mundi t’i rezistonte helmit të shumtë të marrë në trup nga plagët.
I zoti i qenit, Dibakar Raita, u tha gazetarëve: “Jam i tronditur. Ai bëri sakrificën më të lartë për mua dhe familjen time. Do ta kujtojmë deri sa të vdesim. I lutem Zotit të prehet në paqe”.
Pasi mësuan ngjarjen, qindra njerëz shkuan në fshat për t’i bërë nderimet e fundit qenit, i cili u varros si hero.
Telegraph/d.i.
