Nga Fatmir Merkoçi
Është e trishtë kur shikon se shqiptarët përsëri u duhet të votojnë. Tek e fundit, Kodi Zgjedhor u ndryshua dhe qëllimi ishte se do kishim Lista të Hapura. Pra shqiptarët këtë herë, do zgjidhnin përfaqësuesin e tyre të vërtetë. Me sa duket, është bërë e modës nga politika shqiptare që, ajo që thuhet prej tyre është thjesht propagandë dhe jo realitet. Pra, shqiptarët do shkojnë në votime, vetëm e thjesht për të votuar. Ata përsëri u mashtruan nga politika.
Kjo situatë dukshëm u kuptua dhe nga ndërkombëtarët. Vetë ambasadorja znj. Yuri Kim deklaroi: – Mos votoni kriminelin! Mos votoni të korruptuarin! Votoni ndryshimin!
Pra, kjo deklaratë tregon realisht se: Në listat e kandidatëve ka njerëz të inkriminuar. Tregon se thirrja e bërë ndaj kryetarëve të partive nuk u zbatua. Nuk u zbatua as thirrja që i bëri KQZ-së dhe vetë z. Celibashi. Thjesht, në lista hynë njerëzit e inkriminuar ose ata që nuk duhet të ishin. Listat u përpiluan nga kryetarët. Renditja u bë po prej tyre. Pyetja lind vetvetiu. Këta të inkriminuar, janë në vende fituese apo në fundin e listave.
Duke parë zhvillimet e fushatës, e deklaratat e drejtuesve kuptojmë se: Të inkriminuarit janë në vendet fituese. Edhe nëse dikush nuk është i sigurt për fitore, ai po kërkon votë individuale. Kjo gjë nuk ju pëlqeu drejtuesve të partisë. I pari ishte Rama që deklaroi pak ditë më parë se: Mos kërkoni vota individuale, por vetëm vota partie. Kjo u pasua dhe nga kryetarët e tjerë. Me pak fjalë: Kjo tregon se Listat fituese duhet të jenë ato që kanë përcaktuar kryetarët.
Kjo bën që, shqiptarët t’u drejtohen kutive të votimit më 25 prill, thjeshtë si votues partish e jo si zgjedhës. Përfaqësimi i tyre në Kuvend, tashmë është i përcaktuar. Pavarësisht vullnetit apo dëshirës së tyre, ata nuk do të munden të zbatojnë dëshirën e tyre. Arsyeja është e thjeshtë, pasi vota e tyre nuk mund të bëj ndryshim, ashtu siç dhe kërkoi znj. Yuri Kim. Vota e tyre do jetë e përcaktuar. Me apo pa dashje, votuesit do votojnë dëshirën e kryetarëve të partive.
Por dhe në ndodhtë që dikush plotëson numrin e votave fituese, ekzistojnë dy variante. E para, kryetari i partisë, do japi urdhër që numëruesit ( të cilët janë partiakë) të mos ta nxjerrin fitues. Në rastin e dytë, nëse kryetari e parapëlqen fituesin, ai do ta trumpetojë si një zbatim ligji. Dhe si një fitore të votuesve, që mundën të zgjedhin me votë, përfaqësuesin e tyre. Rasti i dytë. Do jetë dhe një “ përgjigje” ndaj deklaratës së znj. ambasadore.
Por a është triumf i politikës ndaj ndërkombëtarëve? Këtu duket se fillon dhe loja e vërtetë. Amerika nuk mundet të pranojë lojërat dhe kamuflazhet e politikës shqiptare. Ajo mëse një herë ka deklaruar se: Amerika është përkrah popullit shqiptar, dhe kështu do jetë gjithmonë.
Nëse deri më sot, Amerika ka luajtur me gjuhën diplomatike dhe herë- herë dhe deri diku e thënë drejtë për drejtë, pas zgjedhjeve do jetë më konkrete.
Apeli që i drejtoi Ramës për koalicion qeverisës, ishte i hapur. Kaq i hapur do jetë dhe pas 25 prillit. Nëse të inkriminuarit, nëpërmjet kamuflimit do futen në kuvend, ata nuk do jenë pjesë e qeverisë. Dhe kjo ka arsyet e veta.
Pas 25 prillit. Amerika dhe Europa, do kërkojnë zbatimin e Reformës në Drejtësi. Këtë reformë nuk mundet ta bëjë një qeveri me njerëz të inkriminuar. Reforma për Amerikën nuk është vetëm ngritja e institucioneve, por edhe zbatimi i saj në terren. Nga Amerika është kërkuar që të kapen “Peshqit e mëdhenj”. Gjë që Qeveria Rama nuk e zbatoi. Pra lind domosdoshmëria e një qeverie ligj zbatuese, por dhe një qeveri që të kryej konfiskimet e të pasurve dhe pronat e pa-ligjshme. Një qeveri që të jetë bashkëpunuese reale me Amerikën. Ndaj dhe znj. Yuri Kim e bëri atë deklaratë.
Pavarësisht nga të gjitha, shqiptarët duhet të zgjedhin këtë radhë dhe nuk duhet të bëhen vegël qorre e tifoza partie. Ndryshimin duhet ta sjell thjesht populli me votë. Sa më i ndërgjegjshëm të jetë këtë herë, aq më shumë do fitojë familja dhe vendi. Tashmë çdo shqiptar e ka kuptuar se: Amerika jo vetëm që është në krahun e tyre, por se gjërat tashmë po i thotë troç e hapur. Ndoshta duhet vullneti i popullit për të bërë ndryshimin e madh. Atë ndryshim, që vetë koha e kërkon. Ndaj nuk duhet të shkohet vetëm për të hedhur votën në kutinë e votimit. Çdo kush, para fletës së votimit, duhet të mendojë për vete, familjen, vendin dhe të ardhmen.
