Një 25-vjeçar i cili jeton në kryeqytet kërkoi ndihmë në policinë e Tiranës që ta mbronte nga gruaja që është aq xheloze sa nuk përmbahet dhe ka shpërthyer në dhunë kundër tij.
Ajo e rrahu partnerin mbasi i kërkoi llogari për adresën se ku kishte qenë orët e fundit, teksa i riu nuk kursehet të tregojë në polici se realisht nuk e kishte njohur kaq ekstreme vajzën me të cilën mbas dy viteve bashkëjetesë, vuri kurorë.
Dosja iu vendos në dispozicion Gazetasi.al nga burime policore që thanë se si shtetasi M.P ia doli mbanë të marrë urdhër të menjëhershëm mbrojtjeje nga gruaja e tij që e përshkruan si tepër nevrike dhe tepër xheloze.
“Më dukej normale xhelozia, kontrolli dhe dominimi në marrëdhënie gjatë fillimeve. Por vitin e fundit kur u martuam nuk shtyhej fare. U njoha me V. si çdo i ri që bie në dashuri dhe që do të krijojë familje. Kur mërzitej dhe shpërthente, habitesha në fillim, por kur pyeta vjehrrën më tregoi se vajza e saj ishte nevrike dhe e stresuar si tip. Kur nevrikosej më qëllonte me shpulla dhe grushta por s’ia vija re, derisa u binda se nga dhuna ajo humbiste kontrollin”,-rrëfehet i riu për bashkëmoshataren, dashuria e të cilëve nuk triumfoi. Në një nga rastet e dhunës, i riu u dhunua prej saj duke u qëlluar me sende të forta në kokë dhe në këto kushte, mbasi u konsultua me prindërit ai vendosi se duhej të divorcohej.
“Kisha shenja në qafë, në kokë dhe në bark dhe pasi u mendova gjatë sepse më kërkonte llogari për femra që nuk ekzistonin, vendosa të mos kthehesha më dhe të dorëzoja kërkesën për divorc. Ia kisha bërë të ditur se në rast se nuk ndryshonte, fundi ishte afër. Kur e njoftova për divorcin u përgjigj duke thënë: divorcin nuk ta jap!”,- shprehet 25-vjeçari i cili pavarësisht këtij paralajmërimi, vendosi që derisa gjykata të jepte vendim, të zhvendosej tek prindërit.
“Ndihem tepër i frikësuar prej saj, jam i kërcënuar fizikisht dhe psikologjikisht. Megjithëse po ndodhnin këto gjëra, sërish e dua dhe kur më telefonoi duke më urdhëruar “hajde më merr”, mora makinën dhe e mora. Qëndruam në hotel për tre ditë dhe ishte e qetë. Më pas më kërkoi që ta çoj tek prindërit e saj në Korçë. Rrugës u bë agresive dhe më kafshoi në kokë duke më shkaktuar një plagë të rrezikshme. E qetësova dhe më pas e çova tek terminali, e hipa në furgon dhe u largova tek prindërit e mi”, shprehet i riu në polici.
Policia tregon për Gazetasi.al se episodi i dhunës nuk ka marrë fund këtu. Në mbrëmje bashkëshorti është telefonuar nga gruaja e tij dhe është kërcënuar.
“Do vij të të vras mu në shtëpi, do të tërheq zvarrë”, i ka shkruar e shoqja në telefon. Kjo ka qenë fraza që e ka bindur 25-vjeçarin të paraqitet në komisariatin e policisë në Tiranë e të kërkojë zgjidhje ligjore.
“Nuk di më si të veproj, nuk di më si të sillem”, ankohet në polici i riu që pyetet nga agjentët nëse përdorte apo jo drogë partnerja.
“Nuk e kam parë asnjëherë diçka të tillë, di të them që ka shpërthime të çuditshme, xhelozi të sëmurë. E kam takuar herët e fundit që të sqarohesha mbasi të dy e duam njëri tjetrin, por kur mendoj sjelljen e saj, trembem dhe nuk dua të vazhdoj më. Nuk jam paraqitur më parë në polici pasi ishte diçka mes nesh ku nuk duhet të hynte shteti, por ndarja nuk u bë normale dhe as bashkëjetesa”, sqaron denoncuesi.
Policia tha për Gazetasi.al se ka marrë në pyetje shtetasen V.P. që pranon se mbas ndarjes i dhanë një mundësi martesës duke u mbyllur për tre ditë së bashku në një hotel dhe se sipas saj, i shoqi ishte i ndikuar nga prindërit.
“Kur dolëm nga hoteli shkuam në qendër tregtare, pastaj hëngrëm drekë dhe më pas luajtëm me makinë në qendër të Tiranës. Në një moment burri më akuzoi se kisha qenë e përdalë kur isha beqare dhe se kisha shkuar me burra të martuar për para dhe se pëlqeja lekun. U ngrita dhe e qëllova me shpullë në faqe, pastaj është e vërtetë që e kam kafshuar mbi kapuç në kokë. Aty duhet të kem humbur ndjenjat. Më pas shkuam në një hotel pranë freskut ku qëndruam gjashtë orë. Dolëm dhe shkuam në bllok ku pimë kafe dhe pastaj burri më hipi në makinën e tij dhe shkuam tek terminali sepse doja të ikja tek prindërit në Korçë. Gjatë rrugës pashë që ai mbante të fshehur telefonin dhe e pyeta pse po sillej kështu por mu përgjigj duke më thënë “mos më kërko llogari se e di vetë se çfarë bëj”.
Kur u ndamë riprodhova këtë bisedë dhe i shkrova “do të vras” për shkak të xhelozisë sepse po mendoja që bisedonte me dikë në Whatsapp”, deklaron 25-vjeçarja. Policia thotë se disponon prova të plota për të ngritur akuzë ndaj të resë e cila për shkaqe familjare pasi ka dy prindërit e sëmurë, nuk u arrestua, por sidoqoftë do të përballet me drejtësinë për akuzën e dhunës në familje./m.j
