Hetimi që çoi të martën nën masa sigurie 5 zyrtarë të Bashkisë së Tiranës dhe tre përfaqësues kompanish private, nisi pas kallëzimit të një qytetari, që pretendoi se në vitin 2021 bashkia i shembi shtëpinë pa njoftim dhe pa vendim zyrtar.
Sipas dosjes hetimore, të siguruar nga A2, pallati në zonën e Kombinatit në kryeqytet, ku ndodhej apartamenti i kallëzuesit, jo vetëm që ishte shembur pa një vendim të Këshillit Bashkiak, por disa muaj më vonë, Bashkia Tiranë kishte kontraktuar kompani private për të shëmbur pallatin e shembur më herët dhe lëvruar fonde për këtë.
Hetimi ka zbuluar se e njëjta skemë është përdorur edhe për5 pallate të tjera, pra gjashtë në total, përmes një procedure ku dyshohet të jenë konsumuar vepra penale të “falsifikimit të dokumenteve” dhe “shpërdorimit të detyrës”.
Për llogari të hetimit, masa e sigurisë “arrest në shtëpi” janë dhënëdrejtorin e Përgjithshëm të kohës s ëEmergjencave Civile, Drejtorin e Drejtorisë së Emergjencave Civile dhe një specialist të IMT. Ndërsa për dy zyrtare të tjera dhe tre përfaqësues të subjekteve private u caktuan masat e “detyrim për paraqitje”.
Nga marrja e dëshmive dhe administrimi i një sërë dokumentesh shkresore ka rezultuar se 6 objekte, përfshi pallatin e kallëzuesit, ishin shembur në janar të vitit 2021 nga Bashkia Tiranë, përmes mjeteve të IMT, operacione ku kishin ndihmuar reparti i zjarrfikësve si edhe Policia e Shtetit. Ndërsa dy muaj më vonë, në mars 2021 Këshilli Bashkiak ka miratur fondet për shembjen e tyre dhe pastrimin e inerteve.
Veprimet fiktive të kryera nga të dyshuarit dhe dokumentacionet me të dhëna të rreme të prodhuara prej tyre kanë dalë zbuluar nga disa dëshmi, por edhe raportet e lëvizjes së mjeteve të IMT dhe të zjarrfikëseve. Nëse zyrtarët e Bashkisë kanë pretenduar se nuk e kujtonin kohën e shëmbjes së pallateve, apo se kishin përpiluar dokumente pa shkuar tek godinat që do të shembeshin, funksionarët e zjarrfikësve apo të policisë kanë treguar se 6 pallatet ishin shembur në janar të vitit 2021.
