Shqipëria do të përfaqësohet nga 9 sportisë në Lojërat Olimpike të “Tokyo 2020”, që do të mbahen në datat 23 korrik-8 gusht.
Të ftuar në emisionin “Java në RTSH”, për të folur per shpresat për medalje të Shqipërisë, ishin sportistët Nikol Merizaj- notare, Briken Çalja- peshëngritës dhe Izmir Smajlaj- atlet.
Në panelin me analistët Preç Zogaj dhe Lorenc Vangjeli, ata u pyetën se si e mendojnë dhe si e parashikojnë këtë aventurë dhe sa janë shanset që flamuri shqiptar të valëvitet.
Sipas tyre, mundësitë janë shumë të mëdhaja pasi është punuar shumë për këtë gjë.
Notarja Nikol Merizaj, kampione absolute e Shqipërisë dhe vetëm 23 vjeç, u shpreh se është e lumtur për arritjet e saj dhe objektivi është që ajo të kap normën olimpike në Tokio.
“Doja të arrija në Tokio dhe pas Tokios në një Olimpiadë tjetër. Padyshim kjo ëndërr e imja nuk do ishte pa mbështetjen e Federatës së notit. Kam shumë dëshirë që suksesin tim t’ja dedikojë edhe Presidentit të Komitetit Olimpik Kombëtar shqiptar, Fidel Yllit. Ai është krahu ynë i djathtë për të gjithë ne. Objektivi që dua të realizoj në Tokio është norma. Duhet të kap normën olimpike, pra rekordi kombëtar që është i mbajtur nga unë, jam shumë afër,”- shprehet Nikol Merizaj.
Ndërkohë, peshëngritësi Briken Çaljau shpreh se po bën më të mirën e tij dhe rrëfen se shanset për medalje janë shumë të mëdha.
“Shanset për të marrë medalje janë shumë të mëdhaja. Jemi brenda zonës së medaljes. Unë jam 1 ndër 5 më të mirët e botës. Shpresoj të bëjmë më të mirën time. Listat e kundërshtarëve kanë dale, unë kam bërë të gjitha testet e mundshme për të dhënë më të mirën time dhe kam shumë besim. Besoj se do të shkojmë deri në fund me dinjitet.”– u shpreh peshëngritësi Briken Çalja.
Sakaq, nga ana tjetër atleti Izmir Smajlaj nuk e fsheh dot optimizmin dhe shprehet se është në formën e tij më të mirë dhe pret të ketë rritje këtë herë.
“Kulmet te kërcimet për së gjati janë arritur mbi moshën 25 vjeç dhe rekordet janë thyer në moshën 28-29 vjeç. Unë jam në formën time më të mirë dhe besoj këto vitet që kam, i kam kulminante, pra do jem në rritje,”- u shpreh atleti Izmir Smajlaj.
Më herët, po në emisionin “Java në RTSH”, Presidenti i Komitetit Olimpik Kombëtar Shqiptar, Fidel Ylli, u shpreh se Shqipëria ka rastin më të mirë për të marrë një medalje dhe kjo gjë bazohet në rezultatet e sportistëve të cilët maten me stërvitjen e tyre, jo vetëm me dëshirën.
Sipas Yllit dhe të tre sportistëve që ishin të ftuar në “Java në RTSH”, do të arrijmë të ngremë flamurin shqiptar në podium.
/b.h
