Gjykata Kushtetuese e Maqedonisë së Veriut ka vendosur të shtyjë seancën për vlerësimin e kushtetutshmërisë dhe ligjshmërisë së Ligjit për përdorimin e gjuhëve për një datë të pacaktuar. Në këtë seancë, pritet të marrin pjesë ekspertë të fushës dhe përfaqësues të partive politike, të cilët do të paraqesin argumentet e tyre lidhur me kontestimin e Ligjit për gjuhët. Propozimi për shtyrjen e seancës u bë nga gjykatësja e Gjykatës Kushtetuese, Elizabeta Dukovska, e cila është përgjegjëse për këtë çështje.
Kundër këtij vendimi ishte gjykatësja Dobrilla Kacarska, e cila e theksoi se gjykata duhet të jetë ajo që jep fjalën përfundimtare. Në hapjen e seancës të mërkurën, gjykatësi Fatmir Skënderi propozoi shtyrjen e seancës për dy javë, me qëllim që të sigurohej prania e dy gjykatësve shqiptarë dhe plotësimi i përbërjes së gjykatës. Propozimi u hodh poshtë me votim, dhe pas kësaj gjykatësi Skënderi lëshoi seancën.
Ndërkohë, jashtë Gjykatës Kushtetuese, lideri i BDI-së, Ali Ahmeti, që udhëheq me Frontin Evropian, deklaroi para njerëzve të mbledhur para objektit se data e 11 dhjetorit 2024 i rikujton periudhën e vitit 1989, kur, sipas tij, “Millosheviçi suprimoi autonominë e Kosovës”.
Para Gjykatës Kushtetueses në Shkup të pranishëm ishin edhe liderë të tjerë të Frontit Evropian në opozitë, si Zijadin Sela, lider i njërit fraksion të Aleancës për Shqiptarë, si dhe një numër i madh qytetarësh dhe simpatizantësh partiakë. Sela theksoi faktin se gjuha shqipe në Maqedoninë e Veriut është elementi bazë për mbajtjen të bashkuar të këtij vendi.
Ligji për përdorimin e gjuhës shqipe si gjuhë zyrtare në territorin e Maqedonisë së Veriut u miratua në vitin 2018, pas një procesi të gjatë politik dhe negociatave që zgjatën për 17 vjet. Ai bëri të mundur që gjuha shqipe të jetë zyrtare në komunat ku shqiptarët përbëjnë më shumë se 20 për qind të popullsisë, si dhe në nivel të autoriteteve qendrore.
/a.r
