Nga Ylli Pata
“Fitorja e 6 marsit” në Shkodër u përdor nga Berisha si me qenq “levë Arkimedi”, kur në fakt sot kryebashkiaku Bardh Spahia nuk ka zgjidh ende nyjen e njerëzve që do të ketë përkrah tij në ekzekutivin e bashkisë. Pasi ka një përplasje të madhe me LSI-në, e cila po refletohet deri në selinë e PS-së, ku mbrëmë pamë një “hall of fame” të figurave të partisë së Ilir Metës.
Megjithatë fitorja e Bardh Spahisë më 6 mars nuk është “veza e Kolombit”, madje edhe pse nuk është thënë realisht kryebashkiaku aktual nuk se i ka gjërat në dorë. Nuk ka shumicën në këshillin bashkiak, e gjithashtu ka shumë pak kohë, deri vitin e ardhshëm për të treguar që ja del për të qeverisur apo krijuar një model për Shkodrën.
Për Shkodrën? PD e ka pasur që nga 31 marsi 1991, e që është një qytet sot pa asnjë model zhvillimi, nuk se PS i ka dhënë një dorë të madhe, madje ka shumë probleme e kritika në këtë rast, por Rama e qeveria e PS ka bërë Shirokën, Vermoshin e Thethin, duke mos i lënë PD-së një mundësi për të treguar se realisht kanë një koncept për qytetin. Që nga Stadiumi “Loro Boriçi”.
“Nuk e ka lënë qeveria PD-në ta bëjë Shkodrën siç e ka vizionin”? Sepse kështu thonë, po realisht si e ka PD vizionin për Shkodrën, por edhe qytetet e tjera. Sepse beteja më e afërt e opozitës në vitin e ardhshëm janë zgjedhjet vendore. PD ka bërë të ditur se ka ndërmend një reformë territoriale, ku ka ndërmend ta ndryshojë konfigurimin e 61 bashkive aktuale. Po a e ka vërtet një vizion të tillë, e nëse e ka ku e mban aman? Po edhe nëse s’e ka të plotë, përsë nuk nis të dsikutojë ide rreth kësaj reforme, që e ka bërë të ditur se e ka për zemër.
Cili është modeli i PD-së për zhvillimin e Tiranës, qyteteve kryesore, të cilat deri më sot i ka kontestuar fort qeverisjen e PS-së? PD akuzon kryebashkiakun Veliaj për ndërtime të shumta? Si e ka vizionin opozita për kryeqytetin? Të jetë një bashki e madhe, apo e ndarë me bashki të tjera më të vogla? Përveç përbetimeve për të ndëshkuar kundërshtarët, çfarë mendojnë ekspertët e PD-së për zhvillimin e kryeqytetit.
Po për Durrësin, i cili zhvilloi zgjedhje më 6 mars? Berisha është kundër ndërtimit të dy porteve? Në dibër kundër Skavicës? Në Elbasan? Derisa nuk ka projekt altenrativa është kundër një pale të të fortëve që i ka prishë punë tjetrës. Korça? Duhet të ketë opozita një ide për të qeverisur bashkinë më të rëndësishëm në verilindje, të cilën e ka pasur PS-ja që nga viti 2007.
Fieri, Vlora, dy zona elektorale ku PD edhe pse nuk fiton ka një pjesë të rëndësishme, madje shumë të rëndësishme të qëndrestarisë opozitare. E ku natyrisht ka probleme që nuk shkojnë, e ku degët e Fierit e Vlorës i dijnë shumë mirë, pasi kanë ekspertë dhe njerëz në territor. A i ka dhënë mundësi PD-ja këtyre zërave opozitarë që vijnë nga Vlora e Fieri për t’ju kundërvënë mazhorancës, që realisht në mënyrë arrogante i quan si bastione?
Çdo parti normale në botë, përpara se të vijë në pushtet e ka krijuar një model të sajin në qeverisjen vendore. Me një fjalë ka bërë një qytet përpara shtetit. Ja nuk po përmendim rastin e Edi Ramës, por në Maqedoninë e Veriut, Zoran Zaev, në një qytet të vogël, në Strumicë arriti të krijojë një model që ishte determinant për të marrë drejtimin e opozitës.
Në Kosovë, opozita që u ndëshkua përballë Albin Kurtit jo vetëm që arriti të bashkohej në zgjedhjet vendore pak muaj më pas, por po tregon modele konkrete të qeverisjes së komuniteteve në Prishtinë, Prizren, Mitrovicë, Pejë, Gjakovë, e thuajse të gjithë vendin. Modele, që tregojnë ditë për ditë se kush janë politikanët që konkurrojnë për të marrë pushtetin.
E në Shqipëri nuk dihet se kush do të jenë ata që do ta kërcënojnë pushtetin e socialistëve. Aktualisht ka dalë vetëm emri i Ilir Metës për bashkinë e Tiranës, që gjithsesi ngjan më shumë si kabare sesa si politikë…
